Read Plautdietsch (Low German) – De Bibel Hiob 3 Bible Online

Hiob 3 - Plautdietsch (Low German) – De Bibel bible

Hiob 3

¹Dan aus Hiob daut ieeschte waut säd, veacht hee dän Dach aus hee jebuaren wia,

³Mucht doa nich soon Dach sennen, aun woonen ekj jebuaren wia, ooda eene Nacht, wua see säden: Wie woaren een Junkje haben.

⁴Mucht dee Dach em diestren veschwinjen; mucht Gott em Himmel dän eendoont sennen; mucht doa kjeen Licht fa dän sennen.

⁵Mucht de Dach dunkel un diesta bliewen, un von dikje Wolkjen bedakjt sennen; mucht dee eene Sonnenvediestrunk jehaut haben, daut see sikj aula enjsten.

⁶Mucht dee Nacht em diestren veschwinjen; mucht dee nich em Joa jefungen woaren, un en kjeene Moonat väakomen.

⁷Mucht dee Nacht onfruchtboa jewast sennen, daut kjeena sikj lud jefreit haud.

⁸Lot dee, waut Leviatan bezeibren kjennen, opp disen Dach beeset nopp brinjen.

⁹Lot däm Morjen kjeen Stiern haben, un vejäfs opp Licht luaren; lot doa kjeen Morjenroot schienen,

¹⁰wiels dee miene Mutta äa Lief nich too hilt, un mie nich fa dit Ojjlekj bewoaren deed.

¹¹Wuarom sie ekj nich bie de Jeburt jestorwen? Wuarom storf ekj nich aus ekj to Welt kjeem?

¹²Wuarom neem miene Mutta mie oppe Schoot, un wuarom wia doa Malkj fa mie?

¹³Dan kunn ekj nu stell ligjen met de Vestorwne, dan kunn ekj schlopen un mie utreiwen,

¹⁴met de Kjennichs un aunjestalde oppe Ieed, waut Ruinen von oole Städa fresch oppjebut haben,

¹⁵un met Vewaulta, dee Golt hauden, un äare Hiesa voll Selwa spikjaden.

¹⁶Wan ekj doch ver miene Tiet jestorwen wia, un unjajeschoaft jeworden wia, soo aus een Kjint, daut nienich daut Licht jeseenen haft.

¹⁷Em Grauf hieet de gottloosa opp met Trubbel moaken; doa kjennen dee, dee meed sent, sikj utreiwen.

¹⁸Doa sent de Jefangne frädlich; doa hieren see nich mea dän Wajchta roopen.

¹⁹Doa sent de groosoatje un de onbekaunde; doa es de Sklow loos von sienen Harn.

²⁰Wuarom jeft Gott Licht fa dee, dee daut miseroblich jeit? Wuarom jeft hee dee, dee aules betta es, daut Läwen,

²¹dee, dee no däm Doot luaren, un dee nich kjemt; ooda dee, dee doano sieekjen aus no waut vestoaknet,

²²un sikj jrintlich freien, wan see bat daut Grauf komen?

²³Wuarom jeft hee Licht fa däm, dee sikj goanich met siene Sach trajchtfinjt, aus wan Gott jieda Däa toojestalt haft?

²⁴Daut stänen kjemt foakna aus Broot äten; daut jaumren kjemt aus een Stroom Wota.

²⁵Daut fa waut ekj mie enjsten deed, es jekomen; daut waut mie gruld, haft mie jetroffen.

²⁶Ekj finj kjeenen Fräd, ekj kaun nich stell sennen, ekj kaun mie nich utreiwen; ekj hab bloos Trubbel.