Read Plautdietsch (Low German) – De Bibel Hiob 35 Bible Online

Hiob 35 - Plautdietsch (Low German) – De Bibel bible

Hiob 35

¹Elihu räd noch wada un säd:

²Kaust du jleewen, daut dit rajcht es? Du sajchst, doa es kjeene Uasoak daut Gott die bestrofen sull,

³un doch frajchst du waut die daut jeholpen haft, daut du nich jesindicht hast.

⁴Ekj woa die un diene Frind eene Auntwuat jäwen.

⁵Kjikj emol nopp enne Loft; wooväl hecha sent de Wolkjen doch aus du.

⁶Wan du eene Sind bejeist, waut moakt Gott daut ut?

⁷Un wan du jerajcht best, woo haft Gott daut waut jeholpen?

⁸Dien schlajchtet, krakjt soo aus dien goodet doonen, traft Menschen, soone aus du best.

⁹De Menschen kloagen, wan see schlemm utjenuzt woaren, un wan groote Jewault aun an utjeeeft woat, sieekjen see Help,

¹⁰oba kjeena frajcht: “Wua es Gott, dee mie jemoakt haft, un dee mie halpt wan daut schwoa jeit,

¹¹dee ons kjlieekja moakt aus de Tieren, un met mea Vestentnis aus de Väajel.”

¹²Wan Menschen uk kloagen, kjemt doch kjeene Auntwuat von Gott, wiels de stolte Menschen soo schlajcht sent.

¹³Gott auntwuat daut kloagen nich, un sitt doa nich no, wan hee uk aule Macht haft.

¹⁴Woo woat hee dan no die horchen, wan du am nich emol seenen kaust; de Entscheidunk licht bie am, un du motst doano wachten.

¹⁵Un dan uk noch, Gott stroft nich wiels hee veläajen es, un moakt nich waut grootet, wan jesindicht woat.

¹⁶Hiob rät väl, waut nuscht enhelt, un rät un rät met kjeen Vestentnis.