Read Plautdietsch (Low German) – De Bibel Hiob 36 Bible Online

Hiob 36 - Plautdietsch (Low German) – De Bibel bible

Hiob 36

¹Elihu haud noch mea to sajen un säd:

²Jeff mie noch een bät mea Tiet, ekj woa die noch waut wiesen; ekj hab noch waut fa Gott to sajen.

³Ekj brinj noch väl Weisheit, un wies, daut dee wäa ons jemoakt haft, daut rajchte deit.

⁴Jo, waut ekj saj es soo; dee waut ver die steit, weet krakjt, woo daut met de Sach es.

⁵Horch emol, Gott es sea stoakj, un hee veacht kjeenem; doa es nuscht, met waut hee sikj nich weet.

⁶Hee bewoat nich däm gottloosen sien Läwen; hee sitt, daut de oame äa rajcht kjrieen.

⁷Hee hieet nich opp met sienen Schutz fa dee waut rechtich haundlen; hee sat dee biesied däm Kjennich sienen Troon, daut see doa lang jeieet woaren.

⁸Un wan de jerajchte faustjenomen woaren, un jebungen sent, aus met Strenj,

⁹dan wiest hee an waut see orrajcht jedonen haben, un wua see huachmootich jewast sent.

¹⁰Hee lat an siene Woarnungen hieren, un velangt daut see von Sinden wajchdreien.

¹¹Un wan see jehorchen un am deenen, dan jeft hee langet Läwen un Jlekj.

¹²Un wan see nich jehorchen, woaren see dootjeschloagen, see stoawen onen daut see jelieet haben.

¹³De gottloose Menschen veoajren sikj, un froagen nich no Help, wan see dol sent;

¹⁴dee velieren äa Läwen aul junk, mank de Huara biem Jetta Aultoa.

¹⁵Dee waut schlajcht auf sent, lat hee derch äa lieden bäta woaren, un lieet an derch Trubbel weis sennen.

¹⁶Soo haft Gott uk die emol von grooten Trubbel jerat, un die väl Rum jejäft un kjeene Jrensen. Soo aus du don daut baste Äten opp dien Desch hautst,

¹⁷soo hast du nu de volle Strof aus dee waut sindjen; un best benomen met daut lieden von daut Uadeel.

¹⁸Lot dien Oaja die nich veleiden, un lot die diene Uagen nich beschmäaren von väl Jelt.

¹⁹Du kaust nich soo sea kloagen daut du looskjemst, un dien grootet Vemieejen kunn nich dän Trubbel väabieejen.

²⁰Jleew nich daut de Nacht woat komen, wua de Velkja plazlich veschwinjen.

²¹Wäa die fa daut beese, dien lieden kjeem toom die bewoaren.

²²Vejat nich Gott siene groote Krauft; es doa wua een Liera soona aus hee?

²³Kjeena sajcht am waut hee doonen saul, kjeena sajcht to am: “Daut es orrajcht”.

²⁴Vejat nich Gott to danken fa daut waut hee deit, fa daut wuafäa de Lied am met Leeda preisen.

²⁵Aule Menschen staunen äwa daut waut hee deit, oba aule seenen daut, soo aus von wiet auf.

²⁶Denkj doch woo groot hee es, daut es nich to bejriepen, daut es nich to vestonen woo lang hee läft.

²⁷Hee nemt daut Wota enne Loft nenn, un jitt daut em Räajen oppe Ieed;

²⁸hee lat de Wolkjen äwaranen, fa aul de väle Menschen.

²⁹Wäa vesteit woo hee de Wolkjen rejieet, un daut Jewitta looslat von sien Zelt;

³⁰woo hee em Licht wont, un dän Boddem vom Mäa toodakjt?

³¹Un met dise rejieet hee de Velkja, un jeft Äten fa aulem.

³²Hee rolt siene Haunt en met Blitz, un schleit doamet krakjt wua hee well;

³³de Rummel lat weeten, wua hee es, un daut Vee feelt daut, wua hee oppkjemt.