Read Plautdietsch (Low German) – De Bibel Hiob 38 Bible Online

Hiob 38 - Plautdietsch (Low German) – De Bibel bible

Hiob 38

¹Un ut daut Owwada kjrieech Hiob dise Auntwuat von Gott.

²Wäa jleefst du daut du best, daut du mien Väahaben en Froag stalst met Wieed, dee nuscht enhoolen?

³Vehool die aus een Maun un horch emol no mie; ekj hab Froagen fa die, un du saust mie dee auntwuaten.

⁴Wua wieescht du aus ekj de Grunt läd fa de Ieed? Saj mie daut, wan du soo väl weetst.

⁵Wäa plond woo groot dee sull sennen, un wäa trock doa dän Motbaunt äwa? Es doa wua waut, waut du nich weetst?

⁶No waut wort nojegroft, dän Foot to saten, ooda wäa sad dän Akjsteen,

⁷aus de Morjenstierns toop sungen, un aule himlische Deena mie lowden?

⁸Wäa hilt väa un sad de Jrensen, aus daut Mäa oppe Ieed väabruak?

⁹Wäa bedakjt daut met Wolkjen aus een Kjleetje, un trock dän dunklen Näwel doarom aus eene Winjel?

¹⁰Wäa sad de Jrens fa daut Mäa, aus wan doa eene Däa un een Baulkjen jesat worden?

¹¹Wäa säd: “Bat hia un nich wieda. Hia motten diene stolte Walen sikj dolen.”

¹²Hast du aul eemol en dien Läwen, daut Morjenroot väajekroacht, ooda am siene Städ väajesajcht,

¹³soo daut jieda Akj oppe Ieed oppjedacht worden, un de beese doa rut jejoacht worden?

¹⁴Hast du daut Jeschekj von de Ieed loten väakomen aus ut eene Form, un de Kalieren kloa woaren aus aun een Kjleet?

¹⁵Daut Licht, waut de gottloose jefelt, woat an jenomen, un äare Macht em diestren woat vedorwen.

¹⁶Best du jewast, wua daut Wota unjen em Mäa nenkjwalt, ooda hast du dän Boddem vom Mäa nojesocht?

¹⁷Hast du de Däaren jeseenen, hinja woone de diestre Welt von de Vestorwne es?

¹⁸Weetst du woo groot de Ieed es? Saj mie daut, wan du daut weetst.

¹⁹Opp woonen Wajch woascht du de Städ finjen, wua daut Licht häakjemt, un wua kjemt daut diestre häa,

²⁰soo daut du wurscht dän Wajch weeten, un dee kjennen trigj no äare Städen leiden?

²¹Du woascht daut dochwoll weeten, du deist je aus wan du soo oolt best, un don aul doa wieescht.

²²Best du en dän Spikja jewast wua de Schnee häakjemt, ooda hast du jeseenen wua de Hoagel häakjemt,

²³dee ekj fa dan oppbewoat hab wan daut schwoa jeit, un fa de Tiet wan de Kjrich un de Kaumf komen.

²⁴Opp woonen Wajch kjemt eena no de Städ, wua de Blitz jeschmäten woat, un wua de Oostwint äwa de Welt vespreet woat?

²⁵Wäa haft de Ranen jemoakt, daut de Plauzräajen aufranen kaun; un dän Wajch jemoakt fa dän Jewitta,

²⁶daut de Räajen doahan kjemt, wua kjeena wont, un enne Wiltnis, wua kjeen Mensch jeit;

²⁷un soo daut de Wiltnis tofräd es, un daut Graus ut de Ieed kjemt?

²⁸Doa haft doch kjeen Voda waut jedonen daut de Räajen un Deiw oppkomen.

²⁹Haft eene Mutta Ies to Welt jebrocht ooda de Ieed bedeift,

³⁰soo daut daut Wota hoat woat aus Steen, un aules äwajefroaren es?

³¹Kaust du daut Säwenstiern toopbinjen to eent, ooda Orion sienen Mauntel opmoaken?

³²Kaust du de Stierns no de Rieej loten oppkomen, un daut kjliene un daut groote Schapkje äare Tieden saten?

³³Vesteist du woo de Sonn, Mon un Stierns äare Ordnunk haben, un kaust du bestemmen, waut dee oppe Ieed doonen?

³⁴Kaust du met diene Stemm de Wolkjen väasajen, soo daut et sea opp die räajent?

³⁵Kaust du dän Blitz rauf schekjen, soo daut dee die deenen kaun?

³⁶Wäa vesteit de Wolkjen to rejieren, un wäa weet wuarom daut deiwen deit?

³⁷Wäa es soo kluak, daut hee sajen kaun woo väl Wolkjen doa sent, un wäa kaun dän Räajen oppe Ieed jeeten,

³⁸soo daut de Ieed een glauta Boddem woat, un de Blott Kjlieta toopbaken?

³⁹Kaust du Tieren brinjen, daut de Leiw fräten kaun, un daut de junge Leiws sikj saut fräten,

⁴⁰wan dee sikj en äare Heelen vekrupen, ooda dee sikj en äare Nasta vestäakjen?

⁴¹Wäa jeft de Kraujen to fräten, wan dee fa Hunga romstolpren un äare junge no Gott roopen no mea Fooda?