Read Plautdietsch (Low German) – De Bibel Hiob 4 Bible Online

Hiob 4 - Plautdietsch (Low German) – De Bibel bible

Hiob 4

¹Dan säd Elifas von Teman:

²Woascht du die hoolen kjennen, wan eena waut to die sajcht? Woo saul eena hia stell bliewen?

³Ekj weet, daut du väle hast Rot jejäft; du hast dee, dee schwak wieren, stoakj jemoakt.

⁴Du hast kunt, dee waut sikj vestaupten, Moot toospräakjen; du hast de enjekjnekjte Kjnee jeholpen jlikj to stonen.

⁵Oba, nu daut die daut traft, weetst du die doa nich met; du vefieescht die nu, daut et bat die es.

⁶Velatst du die nich opp diene Ieaforcht fa Gott, stetst du die nich doaropp, daut du emma daut rajchte deist?

⁷Denkj doaräwa no; es jeemols een oschuldja omjekomen, ooda dee, dee rajcht deed, veschmäten worden?

⁸Ekj hab daut foaken jeseenen daut dee wäa schlajchtet enplieecht un Trubbel seien deit, krakjt daut enne Arnt trigj kjricht.

⁹Wan Gott eemol sien Wint komen lat, dan es daut ut met däm; een Puff von sienen Oaja riemt däm tosied.

¹⁰De Leiw mach brellen un grollen, oba Gott brakjt ar äare Tänen ut;

¹¹wan see nich fräten kaun, kjemt see om, un äare junge woaren vestreit.

¹²Doa schlikjt sikj een Wuat aun mie naun, mien Ua kunn daut meist nich vestonen.

¹³Ekj must goot nodenkjen, waut ekj jedreemt haud, wiels ekj haud sea faust jeschlopen.

¹⁴Oba dan wort mie angst un ekj tekjt, un aul miene Knoakes scheddaden.

¹⁵Doa kjeem een Wint äwa mie, un mie stunden aule Hoa to Boaj.

¹⁶Waut ekj doa ver mie sach, hilt stell, oba ekj kunn daut nich goot utmoaken. Ieescht wia daut stell, oba dan hieed ekj wäm sajen:

¹⁷Kaun een Mensch jerajcht sennen ver Gott? Kaun daut, waut Gott jemoakt haft, sikj rein hoolen fa Gott?

¹⁸Hee kaun sikj nich gaunz opp siene himlische Deena veloten, un beschulcht siene Enjel met Fäla,

¹⁹woo woat hee dan nich dee, waut von Leem jemoakt sent, dee waut von Ieed komen un waut aus Kjniepasch vedrekjt woaren?

²⁰Zemorjes sent see doa, un zeowes sent see doot; dee sent wajch un kjeena denkjt aun dee.

²¹Daut Zelt woat oppjehowen, un dan es doa nuscht jebläwen; kjeena woat doa kluak ut.