Read Plautdietsch (Low German) – De Bibel Hiob 40 Bible Online

Hiob 40 - Plautdietsch (Low German) – De Bibel bible

Hiob 40

¹Dan fruach de HAR Hiob:

²West du däm, dee aule Macht haft, väasajen? Mucht dee, wäa Gott trajchtstalen well, auntwuaten.

³Un Hiob säd to däm HARN:

⁴Waut saul ekj sajen? Kjikj woo weinich daut met mie es. Ekj woa miene Haunt äwa daut Mul hoolen.

⁵Ekj hab meamol waut jesajcht, oba woa nuscht mea auntwuaten; ekj hab too väl jerät un woa nu stell sennen.

⁶Dan räd de HAR to Hiob von em Wintkjriesel:

⁷Vehool die aus een Maun un horch emol no mie; ekj hab Froagen fa die, un du saust mie emol sajen.

⁸Sajchst du, daut ekj nich rajcht recht? Sajchst du, du best rajcht un ekj sie orrajcht?

⁹Best du soo stoakj aus ekj sie? Kaun diene Stemm rumlen soo aus ekj?

¹⁰Stal diene groosoatje Pracht väa un bewies diene Macht, lot seenen, woo harlich du best, un waut von aunseenen du hast.

¹¹Lot dienen Oaja frie ranen, kjikj rauf opp dee, dee sikj waut meenen, un brinj dee een poa Tanken läaja.

¹²Stal die äwa de huachmootje, steet dee rauf, un vetraumpel de gottloose oppe Städ.

¹³Veschoaw dee aula enne Ieed, un vestäakj äare Jesechta, wua see nich to seenen sent.

¹⁴Dan woa soogoa ekj die Aunerkjanunk jäwen, daut du die met diene Krauft jerat hast.

¹⁵See die emol dän Behemot aun, ekj hab beides, däm uk die, jemoakt; dee frat Graus aus een Rint.

¹⁶Oba waut vonne Krauft es en däm siene Schinkjes, un woo stoakj es däm sien Panz?

¹⁷Sien Zoagel es soo stoakj aus een Zeedaboom, un de Sänen en siene Schinkjes sent faust toopjeflajcht.

¹⁸Siene Knoakes sent soo stoakj aus Brons Ruaren, un siene Been aus Iesastangen.

¹⁹Daut Tia es eene Utnom mank daut waut Gott jemoakt haft, un bloos dee, dee am jemoakt haft, kaun däm bandjen.

²⁰Opp de Boaj waust Graus fa däm toom fräten, un aule wille Tieren spälen doa rom.

²¹Dee licht mank daut Spekja Krut, un vestakjt sikj mank de Wieden em Somp.

²²Daut Spekjakrut un de Wieden jäwen däm Schauten bie däm Riefa.

²³Dee haft nich angst fa eenen willen Stroom, un es ruich, wan de Jordan äwa siene Frät pralt.

²⁴Wäa kaun däm jlikjtoo aunjriepen, ooda eenen Strank derch siene Näs trakjen?

²⁵Kaust du Leviatan met eenen Fesch Hoaken jriepen, ooda siene Tung met eene Schlenj dolhoolen?

²⁶Kaust du däm een Strank derch de Näs trakjen, ooda met een Hoaken daut Unjamul hoolen?

²⁷Jleefst, dee woat die no Jnod prachren, ooda fein to die räden?

²⁸Woat dee jeemols een Bunt met die schluten, un die deenen soo lang aus dee läft?

²⁹Kaust met däm spälen aus met een Voagel, ooda aun een Strank, diene Mejales jäwen toom spälen?

³⁰Woaren de Fescha äwa dän strieden, wooväl een jiedra fa dän kjrieen sull, ooda woat de Haundelsmaun dän schlachten?

³¹Kaust du siene Hut met Spiessen volstäakjen, ooda sienen Kopp met een Waulfesch Hoaken anglen?

³²Wan du däm eemol aunjripst, woascht du daut behoolen, un nienich wada doonen.