Read Plautdietsch (Low German) – De Bibel Hiob 41 Bible Online

Hiob 41 - Plautdietsch (Low German) – De Bibel bible

Hiob 41

¹(Un de HAR säd wieda:) Eena mott toostonen, daut wäa Leviatan jeseenen haft, weet sikj nich met däm un mott oppjäwen.

²Kjeena es soo stoakj, daut dee sikj woacht däm opptojoagen. Wäa kunn dan noch jäajen mie bestonen?

³Wäa woat heel doavon komen, wan hee jäajen mie jeit? Soont jeft daut nich unjarem Himmel.

⁴Ekj saj noch mea von woo groot Leviatan es, woo stoakj un jeschekjt dee es.

⁵Wäa kaun am sien Lada auftrakjen, met waut kaust derch siene dobbelde Schal derch?

⁶Wäa kaun däm siene Frät opmoaken? Jieda Tän es toom enjsten;

⁷dee stonen aus eene stolte Rieej Schilten, waut faust aun eenaunda vebungen sent.

⁸Dee sent soo dicht aun eenaunda, daut doa kjeene Loft tweschen jeit;

⁹dee sent dicht un foten sikj toop, daut dee nich gonen uteneen to bräakjen.

¹⁰Wan dee prust, blenkjat daut met Licht, un siene Uagen sent soo root aus de Sonn Oppgank.

¹¹Daut flaumt ut sien Mul rut, un Funken spretzen tosied.

¹²Ut siene Näs rieekjat daut, aus von een Struck Fia unja een Gropen;

¹³dee stekjt een Kolenfia aun met sien Odem, un von sien Hauls pralen de Flaumen.

¹⁴Sien Jenekj es sea stoakj, wäa ver am kjemt, flautat en Forcht;

¹⁵sien Panz es faust un jeft sikj nich, dee es hoat aus jegotnet Guss.

¹⁶Sien Hoat es soo hoat aus Steen, un soo faust aus de unjaschta Molsteen.

¹⁷De stoakjste enjst daut wan dee sikj aunrecht; wan dee kracht, sent see gaunz met Forcht benomen.

¹⁸Kjeen Schwieet ooda Spies, kjeene Schmietstang ooda Feil moaken Schoden un Wunden aun am.

¹⁹Fa däm es Iesa soo aus Stroo, un Brons aus vefuldet Holt.

²⁰Dee brukt sikj fa kjeene Feil enjsten, un Schleidasteena kjitlen am aus Sprie.

²¹Een Kjneppel schot am nich mea aus een Stroohaulm, un de Schmietstangen lacht hee bloos ut.

²²Sien Panz es met Schoawels bedakjt, un hee schlapt sikj derch daut Blott, aus eenen Drasch Schläden.

²³Wan hee em Wota romweelt, lat daut Mäa aus wan daut koakt, ooda soo aus eene Komm voll Taulch un Lei.

²⁴Hinja am schumt daut noch witt, aus een Kopp voll selwanet Hoa.

²⁵Doa es doch kjeen aundret Tia oppe Ieed soo gaunz onen Forcht.

²⁶Hee kjikjt aulem em Uag, uk de huage, hee es de Kjennich äwa aule stolte Tieren.