Read Plautdietsch (Low German) – De Bibel Hiob 42 Bible Online

Hiob 42 - Plautdietsch (Low German) – De Bibel bible

Hiob 42

¹Un Hiob säd to däm HARN:

²Ekj bekjan, daut du aules kaust; die es nuscht ommäajlich, wan du waut plonst.

³Du fruachst wäa ekj jleewd daut du wieescht, daut ekj dien Väahaben en Froag stald. Nu weet ekj daut ekj von waut räd, von waut ekj nuscht wist, waut huaget, waut ekj nich vestunt.

⁴Du sätst ekj sull stell sennen un horchen, un auntwuaten opp daut, waut du fruachst.

⁵Ekj wist von die bloos, waut ekj jehieet haud, oba nu hab ekj die selfst to seenen jekjräajen;

⁶un doaderch bekjan ekj, woo schuldich ekj sie, un pracha en Ieed un Ausch auf.

⁷Aus de HAR derch wia met aul dit to Hiob räden, dan dreid hee sikj no Elifas un säd: Ekj sie sea vestalt äwa die un diene twee Frind, wiels jie nich daut rajchte von mie jesajcht haben, soo aus Hiob, dee mie deent.

⁸Nu well ekj haben daut jie säwen junge Bolles un säwen Bakj no Hiob, dee mie deent, brinjen, un een Brauntopfa moaken fa junt selfst. Un mien Deena Hiob saul fa junt bäden, un ekj woa sien Jebäd aunnämen, un nich met junt vehaundlen, doano aus jie onbedocht vedeent haben. Jie haben nich daut rajchte jesajcht von mie, soo aus Hiob, dee mie deent.

⁹Un Elifas von Teman, Bildad von Schuach un Zofar von Naama jinjen un deeden waut de HAR an jesajcht haud, un Hiob bäd fa siene dree Frind un dan doaropp jeef de HAR an Jnod.

¹⁰Dan leet de HAR Hiob daut wada bäta gonen. De HAR jeef Hiob tweemol soo väl aus hee verhäa jehaut haud.

¹¹Un aul siene Breeda un Sestren kjeemen no am, un uk aul dee, dee am ea jekjant hauden. Un see eeten toop met am en sien Hus un weesen äa Metleet un see treesten am äwa aul dän Schoden dän de HAR haud äwa am komen loten. Un een jiedra jeef am een Stekj Selwa un eenen goldnen Rinkj.

¹²De HAR jeef Hiob dan noch eenen jratren Säajen aus hee verhäa haud. Hiob kjrieech 14.000 Schop, 6.000 Kameelen, 1.000 Poa Ossen, un 1.000 Äsels.

¹³Hiob haud dan uk noch säwen Säns un dree Dajchta.

¹⁴De ieeschte Dochta jeef hee dän Nomen Jemima, de tweede Kezia, un de dredde Keren Hapuch.

¹⁵Doa wieren kjeene aundre Frues en de gaunze Jäajent, waut soo schmock leeten aus Hiob siene Dajchta, un äa Voda jeef an jieda waut Oafgoot met de Säns toop.

¹⁶Hiob läwd dan noch 140 Joa, un kjrieech Kjinja, Grootkjinja, un Uagrootkjinja to seenen.

¹⁷Un aus Hiob storf haud hee een langet scheenet Läwen jehaut.