Read Plautdietsch (Low German) – De Bibel Hiob 5 Bible Online

Hiob 5 - Plautdietsch (Low German) – De Bibel bible

Hiob 5

¹Roop emol, Hiob. Woat die wäa auntwuaten? Opp woonen Heiljen velatst du die?

²De onäwalajda stoaft von orruich sennen, un de onvestendja en sien romiewren.

³Ekj hab jeseenen woo een onäwalajda sikj enwarteld, oba dan met eemol wia aules veschwungen.

⁴Äare Kjinja sent sikj nienich secha; dee woaren biem Puat doljeschloagen, un kjeena steit en fa an.

⁵Dee waut hungat, nämen däm siene Arnt, un soogoa von mank daut Struck; un dee waut darscht, lekjmulen no sien Vemieejen.

⁶Daut beese waust nich jrod soo opp een Aka, un Trubbel kjient nich von en de Ieed;

⁷de Trubbel kjemt oppem Mensch von Jeburt, soo aus Funken von een Fia nopp flieejen.

⁸En diene Städ, wudd ekj mie no Gott dreien, ekj wudd de Sach en Gott siene Henj lajen.

⁹Dee deit groote Dinja, waut nich to vestonen sent, un soo väl Wunda, daut dee nich to talen sent.

¹⁰Hee lat daut opp daut Launt räajnen, un bewessat de Flekja;

¹¹hee häft de Läaje huach opp, un lat dee daut goot utkomen, waut doljeschloagen wieren.

¹²Hee vestieet dän Plon von de jewizte, un lat an äaren Wajch nich utfieren;

¹³hee lat de kluake sikj en äare Kluakheit faust ranen, un lat waut de lestje väahaben aus Donst veschwinjen.

¹⁴Bie kloaren Sonnenschien woat an daut aula diesta; un see langen opp Meddach soo rom aus enne Nacht.

¹⁵Hee rat de oame vom Schwieet, un dee, dee sikj nich weeten, von de stoakje äare Macht.

¹⁶De oame kjrieen Hopninj, un waut onopprechtich es, kjemt nich äwadäl.

¹⁷Woo goot kjemt daut fa däm ut, dee Gott siene Lia aunnemt; lot die daut nich too groff sennen, wan dee, dee aule Macht haft, die belieet.

¹⁸Wan hee eene Wund schleit, dan vebinjt hee dee uk; hee kaun schlonen, oba siene Haunt veheelt uk.

¹⁹Wan hee die uk sas mol haft vom Trubbel jerat, lat hee die daut säwende mol kjeen Schoden haben.

²⁰En de Hungaschnoot woat hee die aum Läwen hoolen, un em Kjrich woat hee die nich stoawen loten.

²¹Hee woat die von dee bewoaren, waut schlajchtet noräden; un du woascht die nich enjsten brucken, wan daut vedoawen äwa kjemt.

²²Bie daut vedoawen un de Hungaschnoot woascht du lachen, un de wille Tieren em Launt woaren die nich enjsten.

²³De Steena oppe Stap woaren die nich baudren, un de wille Tieren woaren die doa tochloten;

²⁴du woascht weeten daut dien Zelt secha es, un du woascht dien Veehock noseenen un doa woat nuscht wajch sennen.

²⁵Du woascht weeten, daut du väl Nokomen haben woascht, un daut dee, dee von die komen, soo väl aus daut Graus oppe Stap sent.

²⁶Soo aus eene Oa nich jedrascht woat ea dee riep es, woascht du nich stoawen ea du oolt best.

²⁷Horch doch. Wie haben dit lang nojesocht un finjen daut es emma soo; nemm daut soo aun, uk fa die.