Read Plautdietsch (Low German) – De Bibel Hiob 7 Bible Online

Hiob 7 - Plautdietsch (Low German) – De Bibel bible

Hiob 7

¹Es eenem siene Tiet oppe Ieed nich soo, aus wan eena toom deenen veflicht es; un sull eena siene Doag nich vejlikjen met eenem dee fa een Dachloon schauft?

²Daut es soo aus fa däm Sklow, dee sikj de Tiet em Schauten wenscht, ooda aus däm Oabeida, dee no sien Dachloon luat.

³Ekj hab Moonaten jehaut, dee nuscht enbrochten; ieremol eene Nacht es mie met lieden verant.

⁴Aus ekj mie dol läd, fruach ekj mie: Woo lang woat daut dieren, bat ekj oppstonen kaun? Mie kjemt de Nacht sea lank väa, un ekj drei mie eemol no daut aundremol, bat schlieslich daut Morjenroot kjemt.

⁵Mien Kjarpa es gaunz voll Warm un miene Hut es brosch un kjietat.

⁶Miene Doag flieejen mie vebie aus een Wäwa sien Schepkje; dee veschwinjen onen daut see Hopninj brinjen.

⁷Hool daut em Denkj, daut mien Läwen aul mau soo aus eemol utodmen es, un miene Uagen woaren nienich wada waut goodet seenen.

⁸Dee waut mie nu noch seenen, woaren mie boolt nich mea seenen; wan du noch eemol kjikjst, woa ekj wajch sennen.

⁹Daut Läwen es aus eene Wolkj, dee doa vedonst un veschwinjt; eena kjemt em Grauf un sticht doa nich wada rut.

¹⁰Eena kjemt nich trigj no sien Hus, un es nich mea opp siene Städ jeseenen.

¹¹Un doawäajen woa ekj nu nich stell sennen; ekj woa sajen, woo schwoa mie dit es, un mien vebettadet Hoat kloagen loten.

¹²Sie ekj aul soo aus daut Mäa un daut Ojjeheia em Mäa, daut du, HAR, Wajchta rom mie stalst?

¹³Wan ekj mie jemietlich em Bad dol laj, daut mie mien Trua een bät leichta saul sennen,

¹⁴dan enjst du mie met Dreem, un stalst mie grulje Bilda väa,

¹⁵soo daut ekj leewa wudd aufjewarcht sennen, un leewa doot sennen aus en dit lieden.

¹⁶Ekj sie saut von läwen; ekj woa nich opp emma läwen; lot mie bloos toch; miene Tiet es aul mau soo aus eemol utodmen.

¹⁷Waut es de Mensch, daut du soo väl von däm moakst, un daut du die om am kjemmascht,

¹⁸un daut du aule Morjen no am kjikjst un am jieda Stund aufproofst?

¹⁹Woascht du eemol soo lang wajchkjikjen, daut ekj mien Kjwiel oppschlucken kaun?

²⁰Du, dee du de Menschen bewoaken deist, waut moakt die daut ut wan ekj mie vesindicht hab? Wuarom hast du mie opp Ziel? Wuarom moakst du die daut schwoa met mie?

²¹Wuarom vejefst du mie nich miene Sind, un nemst mie miene Schult wajch? Ekj sie bat mie enne Ieed lajen, un wan du dan no mie sieekjst, woa ekj aul wajch sennen.