Read Plautdietsch (Low German) – De Bibel Hiob 8 Bible Online

Hiob 8 - Plautdietsch (Low German) – De Bibel bible

Hiob 8

¹Dan säd Bildad von Schuach to Hiob:

²Woo lang woascht du soo räden, un diene Wieed met soo väl Wint stormen loten?

³Meest du werkjlich daut Gott nich rajcht recht, un daut dee, dee aule Macht haft, em Jerecht scheef es?

⁴Wan diene Kjinja orrajcht jedonen haben, dan haft hee an fa äare Sinden bestroft.

⁵Oba wan du die bemieechst ver Gott to komen, un du däm, dee aule Macht haft, aunbäden deist,

⁶wan du onen Schult un jerajcht best, dan woat hee oppkomen un die halpen, un die daut wada häastalen, waut die jehieet.

⁷Wan du uk von waut kjlienet must aunfangen, woascht du lota sea goot auf sennen.

⁸Forsch die daut no, woo daut en aundre Tieden jewast es; horch no daut, waut de Vodasch jefungen haben.

⁹Wie sent noch mau von jistren hia, un wie weeten soo goot aus nuscht; ons Läwen veschleit soo väl aus een Schauten.

¹⁰Woaren dee die nuscht sajen un die nich waut lieren, wan dee waut ut äa Jedajchnis väabrinjen?

¹¹Kaun daut Schelp waussen, wua daut nich naut es, ooda daut Rua, wua kjeen Wota steit?

¹²Un doch wan dee noch blieecht, un nich aufjeschnäden es, vedrieecht dee, un daut noch ea aus aundret Graus.

¹³Soo jeit daut met aul dee, woone Gott vejäten; onen Gott velist eena aule Hopninj.

¹⁴Dee veloten sikj opp eenen Twierem, un saten äa vetruen opp Spandenjewäw.

¹⁵Wäa sikj opp soon Hus velat, kaun nich stonen bliewen; wan eena sikj aun daut länt, woat daut nich hoolen.

¹⁶Dee sent aus Plaunten, dee schmock enne heete Sonn stonen, un äare Auflaja derch däm gaunzen Goaden vespreeden.

¹⁷Dee äare Wartlen schlenjen rom de Steena un hoolen sikj faust aum Steengrunt.

¹⁸Wan dee ut äare Städ jeräten woaren, dan velicht de Städ an un sajcht: Ekj hab junt noch nienich jeseenen.

¹⁹Soon Jlekj haben dee, oba dan komen aundre un nämen äare Städen en.

²⁰Jleew daut, Gott veschmitt däm oschuldjen nich, hee helt däm gottloosen nich bie de Haunt.

²¹Hee woat die wada aum lachen moaken, un du woascht fa Freid schrieen.

²²Diene Fiend woaren sikj schämen motten, un de gottloose woaren äare Städ velieren.