Read Plautdietsch (Low German) – De Bibel Psalmen 1 Bible Online

Psalmen 1 - Plautdietsch (Low German) – De Bibel bible

Psalmen 1

¹Jesäajent es dee, dee de gottloose äaren Rot nich aunnemt, un nich met Sinda toop opp eenen Wajch jeit, uk nich sett wua de Spetta setten,

²dee oba siene Freid aun däm HARN sien Jesaz haft, un sikj Dach un Nacht doamet beschafticht.

³Dee es soo aus een Boom aum Wotastroom jeplaunt, dee siene Frucht to siene Tiet brinjt, un dän de Bläda nich vewalkjen. Un am jelinjt wautemma hee deit.

⁴Oba soo sent de gottloose nich; dee sent soo aus Sprie, daut de Wint vestift.

⁵Doawäajen woaren de gottloose nich en daut Jerecht bestonen un de Sinda nich en de jerajchte äare Jemeenschoft,

⁶wiels de HAR woakt äwa de jerajchte äaren Wajch, oba de gottloose äa Wajch vejeit.