Read Plautdietsch (Low German) – De Bibel Psalmen 10 Bible Online

Psalmen 10 - Plautdietsch (Low German) – De Bibel bible

Psalmen 10

¹Oo HAR, wuarom steist du soo wiet auf? Un wuarom vestakjst du die wan doa Trubbel es?

²De gottloose en äa Stolt unjadrekjen de oame. Lot dee sikj selfst doarenn faust ranen, waut see jeplont haben.

³Wiels de gottloosa pucht doamet, waut sien Hoat velangt, un de Jiezja sajcht dän HARN auf un lastat äwa am.

⁴De gottloosa en sienem Stolt sieekjt nich no Gott; hee räakjent nich met Gott.

⁵Am jlekjt daut met aules waut hee deit. Gott siene Jesazen sent wiet bowa am, daut hee dee nich sitt; un waut siene Fiend aunbelangt, dee schnuzt hee auf.

⁶Hee sajcht sikj em Hoaten: Daut woat emma soo bliewen. Mie woat daut niemols aun waut fälen.

⁷Sien Mul es voll flieekjen, lieejen un aunschmäaren; Trubbel un Onheil ligjen am unja de Tung.

⁸Hee sett enne Darpa oppe Lua, de oschuldje heemlich omtobrinjen. Siene Uagen sieekjen emma no de helploose.

⁹Soo aus een Leiw en siene Gruft, luat hee em Jeheemen de Halploose to äwafaulen. Hee nemt dee faust en sien Nat un schlapt dee wajch.

¹⁰Hee vebrakjt de Halploose un schleit dee met Jewault dol.

¹¹Hee sajcht sikj selfst: Daut haft Gott vejäten; hee kjikjt nich doano; dee woat daut niemols seenen.

¹²Sto opp, oo HAR! Oo Gott, häw diene Henj opp jäajen de gottloose un vejat de unjadrekjte nich.

¹³Wuarom sull de gottloosa Gott lastren un sajen: Du frajchst no nuscht.

¹⁴Oba du, Gott, hast daut jeseenen, wiels du moakjst Trubbel un Älent om daut met diene Haunt trigjtotolen. De Halploose jäwen sikj die han. Du best de Weisenkjinja äare Helpa.

¹⁵Bräakj däm gottloosen un däm schlajchten dän Oarm. Nemm am siene Krauft wajch. Brinj siene Gottloosichkjeit verendach, daut dee aula jestroft woat, bat du nuscht mea finjst.

¹⁶De HAR es Kjennich opp emma un emma. Dee, dee en sien Launt Aufjetta aunbäden, woaren omkomen.

¹⁷HAR, du hast de unjadrekjte äa velangen jehieet. See sent sikj em Hoat secha daut dien Ua daut hieet,

¹⁸daut du de oame un de Weisenkjinja rajcht veschaufst, daut de Menschen nich mea tieraunisch met an omgonen.