Read Plautdietsch (Low German) – De Bibel Psalmen 103 Bible Online

Psalmen 103 - Plautdietsch (Low German) – De Bibel bible

Psalmen 103

¹Eent von David siene Psalmen. Low dän HARN, oo miene Seel, un met aulem waut ekj sie, low sienen heiljen Nomen!

²Low dän HARN miene Seel, un vejat nich waut hee die goodet jedonen haft;

³dee die aul diene Sinden vejeft, un aul diene Krankheiten heelt,

⁴dee dien Läwen vom vedoawen rat, un met Jnod un Metleet kjreent,

⁵dee dien velangen met goodet tofräd stalt, soolang aus du läfst, daut du wada junk un stoakj woascht aus een Odla.

⁶De HAR schauft Jerajchtichkjeit un rajcht fa aulem dee orrajcht lieden.

⁷Hee muak Moses met siene Wäaj bekaunt, un leet daut Volkj Israel weeten, waut hee deed.

⁸De HAR es voll Jnod un Metleet, jeduldich un truhoatich leeftolich.

⁹Hee woat nich emma schellen, un woat nich eewich oajalich bliewen.

¹⁰Hee haundelt met ons nich doano aus onse Sinden vedeent haben, un stroft ons nich doano aus wie orrajcht jedonen haben.

¹¹Wiels soo huach aus de Himmel bowa de Ieed es, soo groot es Gott siene truhoatje Leew to dee, dee am ferchten;

¹²soo wiet aus de Oosten vom Wasten es, nemt hee onse Sinden von ons wajch.

¹³Soo aus een Voda Metleet haft met siene Kjinja, soo haft de HAR Metleet met dee, dee am ferchten.

¹⁴Hee weet von waut wie jemoakt sent; hee denkjt doaraun, daut wie bloos Stoff sent.

¹⁵Een Menschenläwen es soo aus Graus; hee blieecht soo aus eene Bloom oppe Stap;

¹⁶wan de Wint doa äwablost, es dee wajch, un kjeena denkjt doaraun, wua dee jestonen haft.

¹⁷Oba dän HARN siene truhoatje Leew es emma un eewich äwa dee, dee am ferchten, un siene Jerajchtichkjeit opp Kjinja un Grootkjinja,

¹⁸bie dee, dee sienen Bunt hoolen, un doaraun denkjen to doonen, waut siene Jebooten sajen.

¹⁹De HAR haft sienen Troon em Himmel faustjesat, un hee es Kjennich un rejieet äwa aules.

²⁰Loft dän HARN, jie siene jewaultich stoakje Enjel, dee doa doonen waut hee sajcht, un sien Wuat jehuarsom sent!

²¹Loft dän HARN, jie siene Deena, dee sien Wellen doonen!

²²Loft dän HARN, aul siene Woakjen, wuaemma hee rejieet! Low dän HARN, oo miene Seel!