Read Plautdietsch (Low German) – De Bibel Psalmen 105 Bible Online

Psalmen 105 - Plautdietsch (Low German) – De Bibel bible

Psalmen 105

¹Dankt däm HARN un vebreet sienen Nomen; sajcht aule Velkja, waut hee jedonen haft.

²Sinjt un spält to siene Iea; rät von aul siene Wunda.

³Rät huach von sienen heiljen Nomen. Lot dee, dee dän HARN sieekjen von Hoaten froo sennen.

⁴Sieekjt dän HARN un siene Krauft; hoolt am emma em Uag.

⁵Denkjt aun siene Wundawoakjen, dee hee jedonen haft, siene Wunda un Uadeelen, dee hee utjesproaken haft,

⁶jie, dee von sienen Kjnajcht Abraham staumen, jie Kjinja von Jakob, dän hee sikj jewält haud.

⁷Hee es de HAR ons Gott! Siene Jesazesuadeelen sent fa de gaunze Welt.

⁸Hee haft sienen Bunt niemols vejäten, daut Wuat, daut hee fa 1.000 Jennerazionen befool,

⁹dän Bunt, dän hee met Abraham muak, un dän hee Isaak wada jeschwuaren haud.

¹⁰Hee bestädijd dän Bunt met Jakob aus eene Väaschreft em Jesaz, un met Israel aus een Bunt, dee opp emma wia,

¹¹un säd, aus see doa noch mau sea weinje un framd bennen wieren:

¹²Die well ekj daut Launt Kanaan jäwen, aus een Oafgoot.

¹³Dan trocken see von een Volkj no daut aundre, un von een Kjennichrikj no daut aundre.

¹⁴Hee leet an von kjeenem unjadrekjen, un hee stroft soogoa Kjennichs om äat haulwen,

¹⁵un säd: Jie sellen miene jewälde nich em Wäaj stonen, un miene Profeeten kjeen Schoden aundoonen.

¹⁶Un hee leet eene Hungaschnoot em Launt komen, un see kunnen nich arnten uk nich äten;

¹⁷un hee schekjt een Maun ver an han, Josef, dee aus een Sklow vekoft wia.

¹⁸Hee kjrieech schlemme Feet von de Kjäden, un rom sien Jenekj haud hee een Iesarinkj,

¹⁹bat daut soo romkjeem aus hee jesajcht haud, bat de HAR sien Wuat fauststald, daut hee rajcht wia.

²⁰Dan schekjt de Kjennich wäm han am loostoloten; de Har äwa de Velkja befool am frietostalen.

²¹Hee muak am Har äwa sien Hus, un jeef am de Macht äwa aul sien Rikjtum,

²²siene väaschte to belieren, soo aus am daut jefoll, un siene Eltestasch lieren weis to sennen.

²³Dan trock Israel no Ägipten; Jakob läwd aus een framda en Ham sien Launt.

²⁴De Har leet daut Volkj sea vemieren, un muak an stoakja aus äare Fiend.

²⁵Daut wort de Ägipta soo sea jäajenaun, daut see sikj eenich worden an met Lest to vesklowen.

²⁶Hee schekjt an sienen Deena Moses, un uk Aaron, dän hee jewält haud.

²⁷Dee deeden siene Wundatieekjens mank de Ägipta, un Wunda en Ham sien Launt.

²⁸Hee leet daut diesta woaren, un daut wort em Launt diesta; un see bleewen onjehuarsom to siene Wieed.

²⁹Hee leet äare Wota Bloot woaren, un daut muak äare Fesch doot.

³⁰Äa Launt kreiweld voll Poggen, soogoa bat en de Kjennichs äare Stowen.

³¹Opp sien Wuat han, kjeemen doa Schwoarms Flieejen un Lies äwa äare gaunze Jäajent.

³²Hee jeef an Hoagel en de Städ Räajen, un Blitzen, dee äwa daut gaunze Launt strolden.

³³Hee schluach äare Wiengoades un Fiejenbeem dol un vebruak de Beem en äare Jäajent.

³⁴Opp sien Wuat han, kjeem eene ontalboare Zol Graushoppa.

³⁵Dee freeten aules opp waut em Launt jreen wia, uk aule Frucht dee ut de Ieed woss.

³⁶Hee brocht aule Ieeschtjebuarne en Ägipten om, de Ieeschtjebuarne Säns wuarenn äare Krauft wia.

³⁷Un hee brocht Israel rut met Golt un Selwa beloden, un doa wia nich een schwaka mank aul äare Stam.

³⁸Ägipten wia froo aus de Israeliten veleeten, wiels see hauden aula Angst fa an.

³⁹Hee spreed eene Wolkj ut, an to bedakjen, un een Fia, daut see de Nacht Licht hauden.

⁴⁰See prachaden, un hee leet Wiltheena komen, un muak an saut met Broot vom Himmel.

⁴¹Hee bruak dän Steen op, un daut Wota kjeem rut un rand aus een Riefa en de Wiltnis.

⁴²Wiels hee docht aun sien heiljet Wuat, daut hee sienen Deena Abraham jejäft haud.

⁴³Sien Volkj wia froo aus hee an en äa Launt nenbrocht un siene jewälde sungen met Freiden.

⁴⁴Un daut Launt wua de Velkja wonden, jeef hee an un see orwen waut aundre toopjeoabeit hauden,

⁴⁵doaropp daut see siene Rajchts Väaschreften un siene Jesazen hoolen wudden. Haleluja!