Read Plautdietsch (Low German) – De Bibel Psalmen 108 Bible Online

Psalmen 108 - Plautdietsch (Low German) – De Bibel bible

Psalmen 108

¹Een Psalmleet von David.

²Mien Hoat es opp iernst reed, oo Gott, ekj woa sinjen un Instrumenten spälen. Wakj opp, miene Seel.

³Wakj opp, miene Hoap un Jittoa! Ekj woa die tiedich met Leeda lowen.

⁴Ekj woa die, oo HAR, manke Velkja lowen; ekj woa manke Menschen von die sinjen.

⁵Wiels diene truhoatje Leew es groot, hecha aus de Himmel, un die es to vetruen, soo wiet aus de Wolkjen gonen.

⁶Gott, häw die äwa aule Himmel, un lot diene Harlichkjeit äwa de gaunze Ieed sennen!

⁷Rad ons met diene rajchte Haunt, un auntwuat opp ons Jebäd, daut dien Volkj, daut du goot best, kaun jeholpen woaren.

⁸Gott haft en sien Heilichtum jerät, un hee säd: Ekj sie froo daut ekj Sichem endeelen kaun, un daut Sukkot Tol aufmäten.

⁹Gilead un Manasse sent beid miene; Efraim es miene Koppbedakjunk; un Juda halpt mie daut Jesaz uttofieren.

¹⁰Moab es miene Wauschkomm; äwa Edom schmiet ekj miene Schoo, to bewiesen daut et mient es; äwa de Filista woa ekj jewennent schrieen em Triumf, sajcht Gott.

¹¹Wäa woat mie halpen en dee stoakje, vesechade Staut nenn to komen? Wäa woat mie no Edom brinjen?

¹²Woascht du daut nich doonen, Gott, dee du ons vestat hast, un nich mea met onse Kjrieja metjeist?

¹³Halp du ons jäajen onse Fiend, wiels Menschenhelp halpt ons nuscht.

¹⁴Wan Gott met ons es, woa wie fauststonen, un hee woat onse Fiend unjaklunjen.