Read Plautdietsch (Low German) – De Bibel Psalmen 116 Bible Online

Psalmen 116 - Plautdietsch (Low German) – De Bibel bible

Psalmen 116

¹Ekj sie dän HARN goot, wiels hee hieed mie om Jnod bäden.

²Wiels hee no mie horchen deed, woa ekj am aunroopen, soolang aus ekj läw.

³Mie wieren de Doodesstrenj omjebungen, un de Angst fa daut Grauf stunt ver mie. Ekj kjeem en Noot un Älent nenn.

⁴Dan roopt ekj dän HARN sienen Nomen aun: Oo HAR, rad miene Seel!

⁵De HAR es jnodenvoll un jerajcht, un ons Gott es metliedent.

⁶De HAR woakt äwa de eefache. Aus ekj en groote Noot wia, rad hee mie.

⁷Sie nu wada tofräd, oo miene Seel, de HAR deit die goodet.

⁸Wiels du, oo HAR, hast miene Seel vom Doot jerat, miene Uagen von de Tronen, miene Feet vom jleppen.

⁹Ekj woa doa manke Läwendje em Launt ver däm HARN waundlen.

¹⁰Ekj bleef tru, soogoa aus ekj säd: Ekj woa oba sea jeploacht.

¹¹Un aus ekj veläajen wia, säd ekj: Aule Menschen sent Läajna!

¹²Waut kaun ekj dän HARN trigjtolen fa aul daut goode, daut hee aun mie jedonen haft?

¹³Ekj woa daut Drinkjopfa nämen, dän HARN doafäa to danken, daut hee mie jerat haft.

¹⁴Ekj woa ver aule Menschen doonen waut ekj dän HARN vesproaken hab.

¹⁵Siene heilje äa Doot es biem HARN sea wieetvoll.

¹⁶Ekj sie dien Kjnajcht, oo HAR; ekj sie dien Kjnajcht, diene Deenarin äa Sän. Du hast mie ut de Kjäden jeräten.

¹⁷Ekj woa die een Dankopfa brinjen, un dän HARN sienen Nomen aunroopen.

¹⁸Ekj woa dän HARN ver aul sien Volkj betolen, waut ekj am vesproaken hab,

¹⁹opp däm Hoff, ver däm HARN sien Hus, medden en Jerusalem. Haleluja!