Read Plautdietsch (Low German) – De Bibel Psalmen 138 Bible Online

Psalmen 138 - Plautdietsch (Low German) – De Bibel bible

Psalmen 138

¹Een Psalm von David. Ekj well die, oo HAR, von gaunzem Hoaten lowen; soogoa ver de Jetta woa ekj met Leeda lowen.

²Ekj well no dienen heiljen Tempel opptoo aunbäden, un dienen Nomen lowen, daut du soo truhoatich leeftolich best, wiels du hast dien Nomen un dien Wuat äwa aules groot jemoakt.

³Aus ekj die aunroopt, auntwuadsd du mie. Du muakst mie brow un stoakjst miene Seel.

⁴Muchten die aule Kjennichs oppe Ieed danken, wan see de Wieed ut dien Mul hieren,

⁵un von diene Wäaj, HAR, sinjen, wiels diene Iea, HAR, es groot.

⁶Wan du, HAR, uk huach bowen best, du kjikjst rauf un sitst de jerinje, un von wiet auf kjanst du de stolte.

⁷Wan ekj uk medden em Trubbel go, du bewoascht mien Läwen. Du strakjst diene Haunt jäajen miene Fiend äaren Oaja; met diene rajchte Haunt ratst du mie.

⁸De HAR woat daut utrechten, waut hee fa mie jeplont haft. Diene truhoatje Leew, oo HAR, haft kjeen Enj. Veschmiet nich waut diene Henj jeschaufen han.