Read Plautdietsch (Low German) – De Bibel Psalmen 139 Bible Online

Psalmen 139 - Plautdietsch (Low German) – De Bibel bible

Psalmen 139

¹Een Psalm von David, väatosinjen. Oo HAR, du hast mie unjasocht un kjanst mie.

²Du weetst wan ekj sett un wan ekj oppsto. Du weetst von wiet auf, waut ekj denkj.

³Auf ekj opp un rom sie ooda ligj, du best om mie un best met aul miene Wäaj bekaunt.

⁴Ea ekj een Wuat opp de Tung hab, weetst du, oo HAR, aul krakjt waut daut es.

⁵Du best von aule Sieden rom mie, un helst diene Haunt äwa mie.

⁶Soone Erkjantnis es too wundavoll fa mie un daut es too huach; ekj kaun daut nich bejriepen.

⁷Wua kaun ekj han gonen, dienen Jeist loostowoaren; wua han flichten, ut diene Jäajenwuat to komen?

⁸Wan ekj sull nom Himmel foaren, du best doa! Wan ekj mien Bad em Doodenrikj oppmuak, du best uk doa.

⁹Wan ekj daut Morjenroot aus Flichten neem un nom wietsten Mäa fluach,

¹⁰soogoa doa wudd diene Haunt mie leiden, un diene rajchte Haunt mie hoolen.

¹¹Wan ekj sajen wudd, daut diestre sull mie bedakjen un daut Licht rom mie sull Nacht sennen,

¹²dan wudd soogoa daut diestre bie die nich diesta sennen; de Nacht wudd soo schienen aus de Dach, wiels fa die es daut diestre soo aus Licht.

¹³Wiels du hast mie gaunz un goa em Muttalief jeformt.

¹⁴Ekj dank die, daut ekj wundaboa jemoakt sie; diene Woakjen sent wundaboa, daut weet miene Seel sea goot.

¹⁵Miene Jestault wia fa die nich vestoaken, aus ekj em Jeheemen jemoakt wort, wua mie kjeen Uag seenen kunn.

¹⁶Diene Uagen sagen mie ea ekj jebuaren wia. Miene Doag, dee noch komen sullen, wieren aula en dien Buak jeschräwen, ea dee doa wieren.

¹⁷Woo wieetvoll, oo Gott, sent mie uk diene Jedanken. Un wooväl sent doa nich!

¹⁸Wan ekj dee talen sull, wudden doa mea sennen aus de Saunt. Wan ekj oppwakj, sie ekj noch bie die.

¹⁹Oo Gott, wan du de gottloose emol muchst äwatsied brinjen. Un wan dee, dee jieren Bloot vejeeten, mie veloten wudden.

²⁰Dee räden jäajen die met beese Aufsecht. Diene Jäajna mesbrucken dien Nomen.

²¹Sull ekj nich dee veachten, waut die nich lieden kjennen, oo HAR? Un sent mie dee nich äakjlich, dee jäajen die oppstonen?

²²Ekj kaun dee gaunz opp Iernst nich lieden. Ekj hool dee aus miene Fiend.

²³Gott, see emol woo daut met mie steit! Unjasieekj mien Hoat; proow mie ut un see, woo ekj daut meen.

²⁴Un see emol auf ekj opp däm beesen Wajch sie, un leid mie opp däm eewjen Wajch!