Read Plautdietsch (Low German) – De Bibel Psalmen 140 Bible Online

Psalmen 140 - Plautdietsch (Low German) – De Bibel bible

Psalmen 140

¹Een Psalm von David, väatosinjen.

²Halp mie, oo HAR, von de beese Menschen loos; bewoa mie fa de vebräakjarische Menschen,

³dee en äare Hoaten beeset plonen, un aule Dach toopkomen to kjriejen.

⁴Dee moaken äare Tungen soo schoap aus eene Schlangentung, un haben Schlangenjeft unja de Leppen.

⁵Oo HAR, hool mie secha fa de gottloose äare Henj. Bewoa mie fa de vebräakjarische Menschen, dee doa plonen mie doltokjrieen.

⁶De stolte haben fa mie eene Schlenj vestoaken, haben Strenj utjelajcht un doamet fa mie een Nat jespreet, un haben Faulen velenjd mien Stich jestalt.

⁷Oo HAR, ekj saj die, du best mien Gott. Horch, oo HAR, woo ekj om Jnod schrie.

⁸Oo HAR Gott, de Krauft mie to raden, es en die, dee mie em Kjrich daut Schilt äwa däm Kopp helt.

⁹HAR, jeff dän gottloosen nich wuano hee bejierich es; lot am daut met sien beeset Väanämen nich jlekjen, sest mucht hee noch stolt woaren.

¹⁰Lot dee äare Kjap, dee rom mie sent, met daut beese bedakjt woaren, waut äare Räd veuasoakt haft.

¹¹Lot brennende Kolen opp an nopp faulen; lot dee em Fia nenn jeschmäten woaren, en deepe Lajcha nenn, niemols mea opptostonen.

¹²Lot faulsche Pludra sikj nich em Launt faustsaten; mucht daut Ojjlekj de Vebräakja ombrinjen.

¹³Ekj weet daut de HAR fa de oame äa rajcht sorcht, un sikj de unjadrekjte äare Sach aunnemt.

¹⁴Secha woaren de jerajchte dienen Nomen lowen, un de Opprechtje woaren en diene Jäajenwuat wonen.