Read Plautdietsch (Low German) – De Bibel Psalmen 141 Bible Online

Psalmen 141 - Plautdietsch (Low German) – De Bibel bible

Psalmen 141

¹Een Psalm von David. Oo HAR, ekj roop: Komm schwind häa! Horch no mie wan ekj die roop.

²Mucht mien Jebäd ver die komen aus een Ruakopfa, un mien henjopphäwen aus een Owentopfa.

³Stal een Wajchta äwa mien Mul, oo HAR. Woak äwa miene Leppen.

⁴Lot mien Hoat nich metjeräten woaren, beeset to doonen, un nich met schlajchte toop aun gottloose Woakjen deelnämen; lot mie nich äten, waut an gootschmakjt.

⁵Lot de jerajchte mie leeftolich strofen un trajchtwiesen; daut es fa mie Eelj opp däm Kopp. Mien Kopp woat daut nich trigjwiesen, un doch es mien Jebäd emma jäajen de beese.

⁶Äare Leidasch woaren von de steile Kaunt von de Boaj jeschmäten woaren, un de beese woaren lieren, daut ekj de Woarheit jerät hab.

⁷Soo aus eena plieecht un de Ieed oppbrakjt, soo sent onse Knoakes ver däm opnen Grauf vestreit.

⁸Oba miene Uagen kjikjen no die, oo Gott un HAR. Ekj velot mie opp die; lot mie nich enne Grunt gonen.

⁹Bewoa mie fa de Schlenjen, dee see fa mie jelajcht haben, un fa de Faulen, dee de onveschämde fa mie jestalt haben.

¹⁰Lot de gottloose en äare ieejne Nats faulen, un mie doa secha vebie gonen.