Read Plautdietsch (Low German) – De Bibel Psalmen 142 Bible Online

Psalmen 142 - Plautdietsch (Low German) – De Bibel bible

Psalmen 142

¹Een Unjarecht von David, een Jebäd, aus hee en de Heel wia.

²Ekj schrie ut vollem Hauls nom HARN. Ekj schrie nom HARN om Jnod.

³Ekj laj am miene Kloag väa; ver am räd ekj uk von aul miene Trubbels.

⁴Aus mien Jeist de Laust nich mea droagen kunn, dan wist du om mienen Wajch. Opp dän Wajch, dän ekj go, haben see heemlich Schlenjen jelajcht.

⁵Kjikj aun miene rajchte Sied un see; doa es kjeena, dee sikj om mie kjemmat. Ekj finj kjeene Tooflucht; doa es kjeena, dee sikj mie aunnemt.

⁶Ekj schrie, oo HAR, daut du mie hieren saust, un saj: Du best miene Tooflucht; du best aules waut ekj en dit Läwen well.

⁷Horch wan ekj schrie, wiels ekj sie en groote Noot. Rad mie von miene Vefolja, wiels dee sent too stoakj fa mie.

⁸Brinj miene Seel utem Jefenkjnis, daut ekj dien Nomen lowen kaun. Dan woaren de jerajchte sikj om mie saumlen, wan see seenen, woo goot du to mie best.