Read Plautdietsch (Low German) – De Bibel Psalmen 144 Bible Online

Psalmen 144 - Plautdietsch (Low German) – De Bibel bible

Psalmen 144

¹Een Psalm von David. Ekj low däm HARN, dee mie secha helt, dee miene Henj kjriejen lieet un miene Finjasch reedmoakt toom Kjrich,

²mien Leeftolja un miene vesechade Staut, mien huaga Torm un mien Heilant, mien Schilt, un dee, bie wäm ekj Tooflucht näm, dee mie äwa mien Volkj rejieren moakt.

³Oo HAR, waut sent Menschen, daut du an aunerkjanst, ooda de Menschenkjinja, daut du aun an denkjst?

⁴Een Mensch es mau soo aus een Loft Odem; siene Läwestiet, soo aus een veschwinjenda Schauten.

⁵Trakj dienen Himmel uteneen, oo HAR, un komm rauf; steet de Boaj aun, daut dee rieekjren.

⁶Lot daut blitzen un vestrei de Fiend; scheet diene Blitzstrolen, daut see ut Angst wajch ranen.

⁷Strakj diene Haunt von huach bowen rauf; rad mie, trakj mie ut daut jewaultje Wota, ut de framde äare Henj,

⁸dee äa Mul voll Läajes haben, un dee äare rajchte Haunt opphäwen un schwieren, un doch nich de Woarheit räden.

⁹Ekj woa die, oo Gott, een nieet Leet väasinjen. Ekj woa die opp eene tieenseidje Hoap sinjent lowen,

¹⁰die, dee du Kjennichs jewennen latst, un David, dienen Deena, vom merdarischen Schwieet ratst.

¹¹Rad mie un halp mie ut de framde äare Henj rut, dee äa Mul voll Läajes haben un äare rajchte Haunt opphäwen un schwieren un doch nich de Woarheit räden.

¹²Dan woaren onse Säns en äare junge Joaren soo stonen aus voljewosne Plaunten, un onse Dajchta soo aus straume utjeschnizte Akjstendasch, dee een Paulaust zieren.

¹³Onse Spikjasch woaren voll aulahaunt Väarot sennen. Onse Schop woare sikj opp onse Weid Stapen bie dusende un tieen dusende vemieren.

¹⁴Onse Ossen woaren schwoare Fuaren fieren. Doa woaren kjeene Wenj derchjebroaken woaren. Doa woat nich mea faustjenomen woaren. Doa woat kjeen Kloagenjeschrech mea opp onse Gaussen sennen.

¹⁵Jesäajent es daut Volkj fa dän dit soo es. Jesäajent es daut Volkj dän äa Gott de HAR es.