Read Plautdietsch (Low German) – De Bibel Psalmen 145 Bible Online

Psalmen 145 - Plautdietsch (Low German) – De Bibel bible

Psalmen 145

¹Een Psalm von David, sienen Gott to lowen. Ekj woa die lowen, mien Gott, oo Kjennich, un emma un eewich dienen Nomen lowen.

²Ekj well die aule Dach säajnen un emma un eewich dienen Nomen lowen.

³De HAR es groot un sull opp daut aulahechste jeloft woaren. Woo groot hee es, kaun kjeena utspräakjen.

⁴Eene Jennerazion no de aundre woat diene Woakjen väalowen; dee woaren von diene jewaultje Woakjen räden.

⁵Ekj woa äwa diene harlich scheene Pracht un äwa diene Wundawoakjen nodenkjen.

⁶Dee woaren aula von dee Krauft un diene Wundawoakjen räden, un ekj woa vetalen waut du grootet jedonen hast.

⁷Dee sellen doafäa sorjen, daut et niemols vejäten woat, woo goot du best, un met Freid sinjen, von woo jerajcht du best.

⁸De HAR es voll Jnod un Metleet, sea jeduldich un rikj aun truhoatje Leew.

⁹De HAR es to aulem goot, un sien Metleet rieekjt äwa aules, waut hee jemoakt haft.

¹⁰Aul diene Woakjen, oo HAR, woaren die danken. Aul diene heilje woaren die lowen.

¹¹Dee woaren von dien harlichet Kjennichrikj un von diene Jewault räden,

¹²soo daut aule Menschen von diene jewaultje Woakjen un de harliche Pracht en dien Kjennichrikj weeten.

¹³Dien Rikj es een eewjet Rikj, un diene Harschoft hieet niemols opp. Opp däm HARN kjenn wie ons veloten. Hee helt aules waut hee vesproaken haft un jeit met aulem, waut hee jemoakt haft, leeftolich om.

¹⁴De HAR helt aul dee opprajcht dee doa faulen, un recht de unjadrekjte opp.

¹⁵Aulemauns Uagen kjikjen no die, un du jefst an to rajchte Tiet daut äten.

¹⁶Du moakst diene Haunt op, un foodascht aules waut läft, daut see saut un tofräd sent.

¹⁷De HAR es en aul siene Wäaj jerajcht, un truhoatich leeftolich to aules waut hee jemoakt haft.

¹⁸De HAR es aul dee noaun, dee am aunroopen, aul dee, dee am en Woarheit aunroopen.

¹⁹Hee stalt dee tofräd, dee am ferchten. Hee hieet wan see schrieen un halpt an.

²⁰De HAR woakt äwa aul dee, dee am goot sent, oba de gottloose woat hee aula ombrinjen.

²¹Ekj well dän HARN lowen. Lot aules waut Odem haft emma un eewich sienen heiljen Nomen lowen.