Read Plautdietsch (Low German) – De Bibel Psalmen 147 Bible Online

Psalmen 147 - Plautdietsch (Low German) – De Bibel bible

Psalmen 147

¹Loft dän HARN! Woo goot es daut doch, onsen Gott lowen; woo scheen un aunjebrocht, am to lowen.

²De HAR but Jerusalem opp un saumelt de veschlapte Israeliten.

³Hee heelt, dee een jebroaknet Hoat haben; hee bebinjt an äare Wunden.

⁴Hee talt de Stierns un nant dee aula biem Nomen.

⁵Ons Har es groot un jewaultich stoakj. Sien Vestentnis haft kjeene Jrensen.

⁶De HAR häft de unjadrekjte opp, oba brinjt de gottloose en de Grunt.

⁷Sinjt Dankleeda, dän HARN to lowen, loft am met sinjen un Hoapenspell.

⁸Hee bedakjt dän Himmel met Wolkjen un vesorcht de Ieed met Räajen un lat daut Graus opp de Boaj waussen.

⁹Hee vesorcht daut Vee met Fooda, un uk de junge Kraujen, wan dee doano schrieen.

¹⁰Hee haft siene Lost nich en de Pieed äare Krauft, un haft siene Freid uk nich aun een Maun siene stoakje Been.

¹¹De HAR haft siene Freid aun dee, dee am ferchten, dee äare Hopninj en siene truhoatje Leew haben.

¹²Low dän HARN, oo Jerusalem; low dien Gott, oo Zion,

¹³wiels hee moakt diene Puatstangen stoakj, un säajent dee, waut en de Staut wonen.

¹⁴Hee moakt Fräd en diene Jrensen, un lat junt vom basten Weit saut äten.

¹⁵Hee ordent de Ieed aun, waut see doonen saul, un sien Wuat vebreet sikj sea schwind.

¹⁶Hee spreet dän Schnee soo aus Woll, un streit dän Frost soo aus Ausch.

¹⁷Hee schmitt sien Hoagel rauf soo aus Steenakjes. Wäa kaun siene iesendje Kold vedroagen?

¹⁸Hee sajcht bloos een Wuat, dan veschmelten dee; hee moakt sienen Wint weien, dan rant daut Wota.

¹⁹Hee haft Jakob sien Wuat openboat, un Israel siene Jesazen un Väaschreften jejäft.

²⁰Dit haft hee fa kjeen aundret Volkj jedonen; dee kjanen siene Jesazen nich. Haleluja!