Read Plautdietsch (Low German) – De Bibel Psalmen 148 Bible Online

Psalmen 148 - Plautdietsch (Low German) – De Bibel bible

Psalmen 148

¹Loft dän HARN! Loft dän HARN vom Himmel! Loft am dort huach bowen!

²Loft am, aul jie siene Enjel; loft am, siene gaunze, jewaultjet Häa em Himmel!

³Sonn un Mon, loft am; aul jie schienende Stierns, loft am!

⁴Low am du hechsta Himmel, un jie Wotasch bowa de Himmel!

⁵Lot dee dän HARN sien Nomen lowen, wiels hee befool, un dee wieren doa.

⁶Hee haft dee opp emma un eewich opp äaren Plauz jestalt. Hee jeef dee een Jesaz, daut dee motten en äare Bon bliewen; un daut woat niemols endren.

⁷Loft dän HARN opp de Ieed, un aul jie Ojjeheia em deepen Mäa,

⁸Fia un Hoagel, Schnee un Näwel un stoakja Wint, dee soo doonen aus hee sajcht,

⁹jie Boaj un aule Humpels, Fruchtbeem un aule Zeeda,

¹⁰wille Tieren un aulet Vee, Kruptieren un flieejende Väajel,

¹¹Kjennichs opp de Ieed un aule Velkja, jie väaschte un aule Rechta opp de Ieed,

¹²junge Mana un Mejales, oole Menschen un Kjinja.

¹³Lot dee dän HARN sienen Nomen lowen, wiels hee haft dän aulahechsten Nomen. Sien harlich sennen rieekjt soo wiet aus Himmel un Ieed.

¹⁴Hee haft sien Volkj stoakj jemoakt, daut am aul siene heilje en Israel lowen; een Volkj daut am aum Hoaten licht. Haleluja!