Read Plautdietsch (Low German) – De Bibel Psalmen 16 Bible Online

Psalmen 16 - Plautdietsch (Low German) – De Bibel bible

Psalmen 16

¹Eent von David siene Psalmen. Hool du mie secha, wiels ekj sat mien vetruen opp die.

²Ekj säd toom HARN: Du best mien Har; ekj hab buta die nuscht goodet.

³Un waut de heilje em Launt aunbelangt, daut sent de harliche, dee mie gaunz un goa jefaulen.

⁴Oba fa dee, dee Aufjetta hinjaraun ranen, saul de Trua toonämen. Ekj woa kjeen Opfabloot ver de Aufjetta utjeeten un äare Nomes nich äwa miene Leppen brinjen.

⁵De HAR es mien Deel vom Oafgoot; hee helt mie secha.

⁶De Jrenslienjes sent mie toom Jefaulen jetrocken; ekj hab opp Iernst een goodet Oafgoot jekjräajen.

⁷Ekj low dän HARN, dee mie Rot jeef; en de Nacht belieet mie soogoa mien ieejnet Hoat.

⁸Ekj hab dän HARN emma ver de Uagen; wiels hee mie to rajchte Haunt steit, woa ekj secha stonen.

⁹Doawäajen sie ekj von Hoaten froo, un miene Tung rät met Freid. Mien Kjarpa woat uk en Hopninj reiwen,

¹⁰wiels du woascht miene Seel nich dän Doot hanjäwen, un dienen Heiljen nich en daut Doodenrikj nenschekjen.

¹¹Du moakst mie met däm Läwenswajch bekaunt; en diene Jäajenwuat es de Freid soo groot aus dee woaren kaun. Bie die to rajchte Haunt sent eewje Freiden.