Read Plautdietsch (Low German) – De Bibel Psalmen 19 Bible Online

Psalmen 19 - Plautdietsch (Low German) – De Bibel bible

Psalmen 19

¹Eent von David siene Psalmen, väatosinjen.

²De Himmel räden kloa von Gott siene Harlichkjeit, un loten ons sien Hauntwoakj seenen.

³Een Dach rät doavon toom näakjsten Dach, un eene Nacht to de näakjste.

⁴Daut sent nich räden met Wieed; doa es uk kjeene Stemm to hieren.

⁵Siene Rajchtschnua jelt en aule Lenda, un sien Wuat äwa de gaunze Welt; un doa haft hee fa de Sonn een Zelt oppjestalt,

⁶ut daut dee soo rut kjemt aus wan een Briegaum ut siene Stow kjemt, un freit sikj soo aus een stoakja Maun, siene Strakj to ranen.

⁷Dee jeit aun een Enj vom Himmel opp, un jeit rom bat daut aundre Enj, un fa äare Hett kaun sikj nuscht vestäakjen.

⁸Dän HARN sien Jesaz es volkomen un jeft de Seel nieet Läwen. Eena kaun sikj veloten opp daut waut de HAR sajcht, un daut moakt dee weis, dee daut fält.

⁹Dän HARN siene Befäle sent rajcht, un moaken ons Freid em Hoat. Gott siene Jebooten sent rein, un moaken ons de Uagen op.

¹⁰Gottesforcht es rein, un woat eewich bestonen. Dän HARN siene Jerechten sent gaunz un goa rajcht un opprechtich.

¹¹Dee sent mea wieet aus Golt, jo, mea aus väl ajchtet Golt, un seeta aus frescha, reina Honnich.

¹²Un noch mea, dien Kjnajcht woat derch dee uk jewoarnt, un wäa dee hoolen deit haft een grooten Loon.

¹³Wäa kaun daut moakjen, woo foaken eena fälen deit? Vejeff mie uk dee Sinden von dee ekj nich weet!

¹⁴HAR, bewoa mie uk fa mootwelje Sinden; lot dee nich äare Macht äwa mie haben. Dan woa ekj opprechtich sennen un oschuldich von groote Sinden.

¹⁵Muchst du aun de Wieed ut mien Mul, un aun de Jedanken en mien Hoat een Jefaulen haben. Oo HAR, en die es miene Krauft, un du radsd mie.