Read Plautdietsch (Low German) – De Bibel Psalmen 21 Bible Online

Psalmen 21 - Plautdietsch (Low German) – De Bibel bible

Psalmen 21

¹Eent von David siene Psalmen, väatosinjen.

²Oo HAR, de Kjennich freit sikj en diene Krauft, un woo es hee doch soo froo, daut du am halpst!

³Du hast am jejäft, waut sien Hoat velangt, un nich trigjehoolen, wuano siene Leppen fruagen.

⁴Du kjemst am met groote Säajnungen entjäajen un satst am eene Kroon von reinem Golt opp däm Kopp.

⁵Hee fruach die no Läwen, un du jeefst am daut, langet Läwen opp emma un eewich.

⁶Hee es derch diene groote Help sea jeieet. Du hast groossoatje Harlichkjeit äwa am jesat.

⁷Secha hast du am eewje Säajnungen tookomen loten un am met diene Jäajenwuat froo jemoakt.

⁸De Kjennich velat sikj opp däm HARN, un derch dän Aulahechsten siene truhoatje Leew woat hee fauststonen.

⁹Diene Haunt woat aul diene Fiend to hoolen kjrieen; diene rajchte woat utfinjen, wäa dee sent, dee die fientlich jesonnen sent.

¹⁰Wan du komen woascht, woascht du dee soo moaken aus een flaumenda Owen; de HAR woat dee en sienen Oaja ombrinjen, un Fia woat dee oppfräten.

¹¹Du woascht dee met Kjinja toop ombrinjen un äwatsied schaufen.

¹²See plonden die Schoden auntodoonen, oba see woaren äare Aunschläaj nich kjennen derchfieren.

¹³See woaren die dän Rigjen dreien, wan du met däm utjerakjten Boagen no äare Jesechta zielen woascht.

¹⁴HAR, veharlich du die selfst en diene ieejne Krauft. Wie woaren diene Krauft besinjen un lowen.