Read Plautdietsch (Low German) – De Bibel Psalmen 22 Bible Online

Psalmen 22 - Plautdietsch (Low German) – De Bibel bible

Psalmen 22

¹Eent von David siene Psalmen, väatosinjen; no de Wies: De Reekoo, dee tiedich jejäajat wort.

²Mien Gott, mien Gott, wuarom hast du mie veloten? Wuarom blifst du met diene Help soo wiet auf un horchst nich no mien stänen?

³Oo mien Gott, ekj schrie aule Dach, oba du auntwuatst mie nich; uk de Nacht, un finj kjeene Ru.

⁴Un doch best du jekjreent aus de Heilja; du best dee, dän Israel loft.

⁵Onse Vodasch saden äa vetruen opp die; see vetruden die un du holpst an.

⁶See schrieejen no die un worden jerat; see veleeten sikj opp die un worden nich toschaund.

⁷Oba ekj sie een Worm un nich een Mensch, een Spott unja de Menschen un vom Volkj veacht.

⁸Wäaemma mie sitt, spott äwa mie. See moaken dikjlepje Faksen un schedren met de Kjap un sajen:

⁹Hee veleet sikj opp däm HARN, dan lot däm am nu halpen. Wiels de HAR siene Lost aun am haft, dan lot am nu raden.

¹⁰Un doch brochst du mie utem Muttalief; du schaufst en mie een vetruen, aus ekj noch aun de Muttabrosten lach.

¹¹Ekj wia von Jeburt aun von die aufhenjich; du best von Jeburt aun mien Gott jewast.

¹²Sie nich wiet auf von mie, wiels Trubbel es dicht bie, un hia es kjeena mie to halpen.

¹³Miene Fiend sent om mie aus eene Häad Bolles. Jewaultje Bolles sent runtom mie.

¹⁴See rieten äare Frät op no mie aus een rietenda, brellenda Leiw.

¹⁵Ekj sie utjegoten aus Wota, miene Knoakes sent aula utem Jelenkj; mien Hoat es en mie aus jeschmoltna Waus.

¹⁶Miene Krauft es soo aus drieeje Schoawels, un de Tung bakt mie aum Bän aun; du hast mie fa doot em Stoff jelajcht.

¹⁷De Hunj sent bie mie omhäa, un eene gottloose Baund es runtom mie; dee haben mie derch de Henj un Feet jespekjt.

¹⁸Ekj kaun miene Knoakes aula talen; see glotzen no mie un seenen äare Lost aun mie.

¹⁹See deelen sikj miene Kjleeda en, un lossen mienen Äwarock ut.

²⁰Oba du HAR, sie nich wiet auf von mie; du best miene Krauft, komm schwind un halp mie!

²¹Rad miene Seel vom Schwieet, mien Läwen ut de Hunj äare Jewault!

²²Halp mie ut dän Leiw siene Frät rut, un dän willen Boll von de Hieena to komen! HAR, du hast mie jeauntwuat.

²³Ekj woa miene Breeda dienen Nomen prädjen un die en de Jemeent sinjent lowen.

²⁴Jie, dee dän HARN ferchten, loft am; aul jie dee von Jakob staumen, veharlicht am, un fercht am, aul jie dee von Israel staumen.

²⁵Hee haft de oame äa Älent nich veacht, un sikj nich aufschuent von an trigjetrocken, un aus see am aunschrieejen hieed hee an.

²⁶HAR, die well ekj en de groote Vesaumlunk lowen; ekj woa mien Vespräakjen hoolen ver dee, dee die ferchten.

²⁷De oame sellen äten un saut woaren; dee dän HARN sieekjen woaren am lowen; muchten dee lang un jlekjlich läwen.

²⁸De gaunze Welt woat doaraun denkjen un sikj nom HARN dreien, un ut aule Velkja sellen aule Famieljes die aunbäden.

²⁹Wiels daut Rikj es dän HARN sient, un hee rejieet äwa de Velkja.

³⁰Aul dee, dee goot auf sent opp de Ieed, woaren aunbäden; ver am woaren aule stoafliche Menschen äare Kjneeen bieejen, un uk dee, dee hia soo kjemmalich läwen.

³¹De HAR woat Nokomen haben, dee am deenen; vom Harn woat to Kjint un Grootkjint jerät woaren.

³²See woaren komen un siene Jerajchtichkjeit, un waut hee jedonen haft, to een Volkj prädjen, daut noch nich jebuaren es.