Read Plautdietsch (Low German) – De Bibel Psalmen 25 Bible Online

Psalmen 25 - Plautdietsch (Low German) – De Bibel bible

Psalmen 25

¹Eent von David siene Psalmen. Mien velangen, HAR, es die auntobäden.

²Mien Gott, mien vetruen es opp die; lot mie nich toschaund woaren, daut miene Fiend sikj nich äwa mie freien.

³Wiels wäa met die räakjent, woat niemols toschaund woaren; oba dee doa onen Uasoak veachten, woaren toschaund woaren.

⁴HAR, wies mie diene Wäaj, un woont diene Stieej sent.

⁵Leid mie en diene Woarheit un belia mie! Wiels du best dee Gott, dee mie halpt; ekj räakjen aule Dach met die.

⁶HAR, denkj aun dien Metleet un aun diene truhoatje Leew, wiels dee sent aul von oole Tieden häa.

⁷Denkj nich aun de Sinden en miene Jugent, un aun miene wadaspanstje Wäaj; oba denkj aun mie en diene truhoatje Leew, wiels du soo goot best.

⁸De HAR es wundaboa goot un jerajcht, doawäajen wiest hee de Sinda trajcht opp däm Wajch.

⁹De deemootje halpt hee daut rajchte to finjen, un lieet dee sienen Wajch.

¹⁰Dän HARN siene Wäaj sent aula truhoatje Leew un Woarheit, fa dee, dee daut doonen waut sien Bunt velangt.

¹¹HAR, om dienen Nomen to ieren, vejeff mie miene groote Sind.

¹²Wäa es dan dee Maun, dee dän HARN fercht? Däm woat hee dän Wajch wiesen, dän hee wälen saul.

¹³Siene Seel woat doa wonen, wua daut goot es, un siene Kjinja woat daut Launt jehieren.

¹⁴De HAR haft een vetruen opp dee, dee am ferchten; dee woat hee sienen Bunt wiesen.

¹⁵Ekj hool dän HARN emma em Uag, wiels hee woat miene Feet ut de Schlenj nämen.

¹⁶Komm no mie un lot mie diene Jnod seenen, wiels ekj sie eensom un em Älent.

¹⁷Ekj hab groote Angst em Hoat; brinj mie ut miene Veläajenheit!

¹⁸See emol mien Jauma un Älent, un nemm mie aul miene Sinden auf.

¹⁹Kjikj no miene väle Fiend, un woo schlajcht dee mie lieden kjennen.

²⁰Bewoa miene Seel un rad mie, lot mie nich toschaund woaren, wiels ekj velot mie opp die.

²¹Lot mie derch goot un opprechtich sennen bewoat bliewen, wiels ekj räakjen met die.

²²Gott, rad Israel ut aul äare Noot!