Read Plautdietsch (Low German) – De Bibel Psalmen 27 Bible Online

Psalmen 27 - Plautdietsch (Low German) – De Bibel bible

Psalmen 27

¹Eent von David siene Psalmen. De HAR es mien Licht un miene Radunk; fa wäm sull ekj mie ferchten! De HAR es miene Läwenskrauft en dee ekj secha sto; fa wäm sull ekj mie enjsten!

²Aus de Beese sikj äwahäa muaken, mie en de Grunt to brinjen, randen see sikj faust un follen.

³Un wan mie eene Armee äwafaulen wudd, doawäajen wudd mien Hoat sikj nich ferchten. Un wan jäajen mie wudd Kjrich utbräakjen, wudd ekj mie uk dan opp die veloten.

⁴Doa es eent om daut ekj dän HARN bedd, waut ekj jieren haben mucht, daut es daut ekj mien gaunzet Läwen en Gott sien Hus bliewen kunn, om to seenen woo harlich de HAR es, un am en sienen Tempel to sieekjen.

⁵Wan ekj en Trubbel kom, woat hee mie en siene Woninj secha hoolen; hee woat mie en sien Zelt vestäakjen, un mie opp een huagen Steen secha stalen.

⁶Dan woat mien Kopp huach äwa miene Fiend, dee rom mie sent, jehowen woaren; doawäajen woa ekj am en sien Zelt, met Freid, Opfa brinjen, am lowen un Dankleeda sinjen.

⁷HAR, hia mie wan ekj lud schrie, hab Metleet met mie un jeff mie eene Auntwuat.

⁸Aus du sätst: Komt sieekjt mie! säd mien Hoat to die: Die woa ekj mie sieekjen.

⁹Dan vestäakj dien Jesecht uk nich fa mie. Schekj dienen Deena nich em Oaja trigj. Du wieescht je mien Helpa, dan steet mie nich trigj, un velot mie nich, oo Gott mien Rada!

¹⁰Wan mien Voda un miene Mutta mie uk veloten, de HAR woat sikj mie aunnämen.

¹¹HAR, wies mie dän rajchten Wajch, un leid mie opp eene jlikje Bon, wiels miene Fiend rom mie sent.

¹²Jeff mie nich äwa no miene Fiend äaren Wellen, wiels dee beschuljen mie met Dinja, dee ekj niemols jedonen hab, un plonen mie to kjwälen.

¹³Ekj jleew oba doch, daut ekj daut goode vom HARN noch hia en de Läwendje äa Launt seenen woa.

¹⁴Räakjen met dän HARN! Sie stoakj un von Hoaten mootich, un räakjen met dän HARN!