Read Plautdietsch (Low German) – De Bibel Psalmen 28 Bible Online

Psalmen 28 - Plautdietsch (Low German) – De Bibel bible

Psalmen 28

¹Eent von David siene Psalmen. Ekj roop die, oo HAR, mien Toofluchtsteen; drei mie nich een doowet Ua han. Wiels wan du stell blifst, woa ekj soo sennen aus dee, dee aul em Grauf ligjen.

²Hia mie om Jnod prachren, wan ekj no Help schrie, wan ekj miene Henj opphäw no dien Aulaheilichstet opptoo.

³Schlap mie nich met de gottloose toop wajch, dee doa beeset väahauden, dee doa frädlich to äare Nobasch räden, oba em Hoat beeset plonen.

⁴Tol an doano aus äare Woakjen sent, un doano aus see beeset väahaben; jeff an doano, waut äare Henj jedonen haben; jeff an waut see vedeent haben.

⁵Wiels see dän HARN siene Woakjen, un waut siene Henj jedonen haben, nich achten, woat hee dee en de Grunt brinjen un niemols mea oppbuen.

⁶Ekj low Gott, wiels Hee haft mien prachren om Metleet jehieet.

⁷De HAR es miene Krauft un mien Schilt; mien Hoat velat sikj opp am, un ekj sie jeholpen; mien Hoat sprinjt fa Freid, un ekj woa am een Dankleet sinjen.

⁸De HAR es sien Volkj äare Krauft, een Radungsuat fa sienen jesaulften Kjennich.

⁹Oo HAR, rad dien Volkj un säajen dien Oafgoot; sie äa Hoad un droag an emma un eewich!