Read Plautdietsch (Low German) – De Bibel Psalmen 30 Bible Online

Psalmen 30 - Plautdietsch (Low German) – De Bibel bible

Psalmen 30

¹Eent von David siene Psalmen, bie de Tempel Enweiunk to sinjen.

²HAR, ekj well die huach häwen, wiels du hast mie jeheelt, un leetst miene Fiend sikj nich äwa mie freien.

³HAR, mien Gott, aus ekj no die om Help schrieech, muakst du mie jesunt.

⁴HAR, du hast miene Seel veschoont un mie aum läwen jehoolen, daut ekj nich en daut Grauf brukt.

⁵Sinjt fa am, jie siene heilje; loft sienen heiljen Nomen.

⁶Wiels sien Oaja es mau fa een Uagenblekj, oba siene Jnod es fa Läwestiet. Ekj mach de Nacht äwa hielen, oba zemorjes kjemt wada Freid.

⁷Ekj oba säd, don aus mie daut goot jinkj: Ekj woa niemols mea unjaligjen.

⁸Oo HAR, derch dien jefaulen aun mie, hautst du mienen Boajch stoakj jemoakt. Oba aus du die vestuakst, wia mie angst.

⁹Dan roopt ekj die, HAR, un fruach no diene Help.

¹⁰Waut es en mien Doot fa een Jewenst, wan ekj em Grauf ligj? Woat de Stoff die lowen, un woat dee doavon räden, woo tru du best?

¹¹Horch, oo HAR, un hab Metleet met mie! Oo HAR, sie du mien Helpa!

¹²Du hast mie mien kloagen jenomen, un en de Städ mie jemoakt met Freid to sinjen. Du hast mie miene Truakjleeda utjetrocken un mie met Freidenkjleeda jekjleet,

¹³daut mien Hoat die sinjent lowen kaun un nich stell bliewen. Oo HAR, mien Gott, ekj well die eewich danken.