Read Plautdietsch (Low German) – De Bibel Psalmen 32 Bible Online

Psalmen 32 - Plautdietsch (Low German) – De Bibel bible

Psalmen 32

¹David jeft Unjarecht. Jesäajent sent dee Menschen, dän äa Vegonen vejäft es, un dän äare Sinden bedakjt sent.

²Jesäajent sent dee Menschen, dän de Har de Schult nich aunräajent, un dee en äaren Jeist gaunz opprechtich sent.

³Aus ekj miene Sind stelhoolen wull, ständ ekj dän dachäwa doarunja, daut ekj schia omkjeem.

⁴Dach un Nacht drekjt mie diene schwoare Haunt; miene Krauft veschwunk mie aus en de Sommahett

⁵Dan bekjand ekj die miene Sind, un dakjt kjeen orrajcht mea too. Ekj säd: Ekj well dän HARN mien Vegonen bekjanen, un dan vejeefst du mie miene Sindenschult.

⁶Doawäajen woaren aule heilje to die bäden soo lang aus du to finjen best, un wan dan een Huachwota kjemt, woat an daut nich dicht bie komen.

⁷Bie die kaun ekj mie vestäakjen; du woascht mie fa Trubbel bewoaren, daut ekj die lowen kaun, daut du mie jerat hast.

⁸Ekj woa die unjarechten un die dän Wajch wiesen dän du gonen saust; ekj woa die Rot jäwen un die em Uag hoolen.

⁹Siet nich soo aus Pieed un Multieren, dee nuscht vestonen, dee eena oppteemen mott, om dee bie sikj to hoolen.

¹⁰De gottloosa haft väl Ploagen, oba dän HARN siene truhoatje Leew es om dee, dee sikj opp am veloten.

¹¹Siet froo em HARN un freit junt, jie jerajchte, un sinjt met Freid, aul jie dee von Hoaten opprechtich sent.