Read Plautdietsch (Low German) – De Bibel Psalmen 33 Bible Online

Psalmen 33 - Plautdietsch (Low German) – De Bibel bible

Psalmen 33

¹Freit junt em HARN, oo jie jerajchte! De fromme sellen am lowen.

²Loft dän HARN met Hoapenspell un spält am eene Mellodie opp eene Hoap met tieen Seiden.

³Sinjt fa am een nieet Leet; spält scheen un schriet ut Freiden.

⁴Wiels wautemma Gott sajcht, es rajcht, un wautemma hee deit, doaropp kjenn wie ons veloten.

⁵Hee jleicht daut rajchte Jerecht un jerajcht sennen; Gott siene truhoatje Leew es äwa de gaunze Ieed.

⁶Derch dän HARN sien Wuat worden de Himmel häajestalt, un aules waut doatoo jehieet, derch daut, waut hee jerät haft.

⁷Hee saumeld aulet Mäawota opp eene Städ, un helt väl Wota en siene Zistasch.

⁸Lot de gaunze Welt dän HARN ferchten; lot aules waut en de Welt wont am huach achten.

⁹Wiels hee räd, un soo wia daut uk doa; hee jeef sienen Befäl, un soo stunt daut faust.

¹⁰De HAR moakt de Velkja äaren Rot to nuscht, un moakt de Menschen äare Plons, daut dee nuscht utrechten.

¹¹Oba dän HARN sien Rot blift eewich stonen, un waut hee em Hoat plont steit eewich.

¹²Jesäajent es daut Volkj, daut Gott aus äaren HARN haft, dee Menschen, dee hee sikj aus sien Oafgoot jewält haft!

¹³De HAR kjikjt vom Himmel rauf un sitt aule Menschenkjinja.

¹⁴Von doa wua hee opp sienen Troon sett, sitt hee aule, dee opp de Ieed wonen.

¹⁵Hee lenkjt an aula daut Hoat, un beoobacht aules waut see doonen.

¹⁶Een Kjennich woat nich derch siene groote Armee jerat; een Ries woat nich derch siene groote Krauft jerat.

¹⁷Pieed halpen uk nuscht, un äare groote Krauft kaun nich raden.

¹⁸Oba de HAR helt dee em Uag, dee am ferchten, dee met siene truhoatje Leew räakjnen,

¹⁹daut hee äare Seelen vom Doot raden woat un an en de Hungaschnoot aum läwen hoolen woat.

²⁰Onse Seel räakjent met dän HARN; hee es onse Help un ons Schilt.

²¹Ons Hoat freit sikj en am, wiels wie ons opp sienen heiljen Nomen veloten.

²²Lot diene truhoatje Leew doano äwa ons sennen, aus wie onse Hopninj opp die saten.