Read Plautdietsch (Low German) – De Bibel Psalmen 34 Bible Online

Psalmen 34 - Plautdietsch (Low German) – De Bibel bible

Psalmen 34

¹David sien Psalm, aus hee sikj ver Abimelech vestald aus wan hee dwautsch wia un dee am wajch juach un hee dan wajchjinkj.

²Ekj well dän HARN emma lowen; mien Mul saul emma reed sennen am to lowen.

³Miene Seel saul vom HARN emma goodet räden, daut dee, waut em Älent sent, daut hieren un sikj doatoo freien.

⁴Veharlicht met mie dän HARN; well wie aulatoop sienen Nomen huach ieren.

⁵Ekj socht dän HARN un hee auntwuad mie, un hee rad mie ut aul miene Forcht.

⁶Dee, dee sikj opp am veloten, haben een Jesecht daut met Freid strolt, un see woaren niemols toschaund.

⁷Aus dis Maun en sien Älent schrieech, hieed de HAR am un holp am ut aul siene Noot.

⁸Däm HARN sien Enjel loagat sikj om dee, dee am ferchten un halpt an ut.

⁹Finjt eemol selfst ut, woo goot de HAR es. Woo goot es daut fa däm, dee sikj opp am velat!

¹⁰Fercht dän HARN, jie siene heilje; dee am ferchten woat daut aun nuscht fälen.

¹¹Soogoa de junge Leiws kjennen schwak un hungrich woaren, oba dee, dee dän HARN sieekjen, woat daut aun nuscht goodet fälen.

¹²Kjinja, komt häa un horcht no mie; ekj woa junt lieren dän HARN to ferchten.

¹³Wäa es doa dee jieren läwen un goode Doag haben mucht?

¹⁴Dan hool diene Tung vom beesen, un diene Leppen, daut dee nich Läajes räden.

¹⁵Bliew von daut beese wajch un doo goodet. Sieekj Fräd, un sträw doano dän to hoolen.

¹⁶De HAR haft de jerajchte em Uag, un siene Uaren hieren wan dee schrieen.

¹⁷De HAR haft sikj oba jäajen dee jesat, dee beeset doonen, daut oppe Ieed nich mea aun an saul jedocht woaren.

¹⁸De jerajchte schrieen, un de HAR hieet un halpt an ut aul äare Noot.

¹⁹De HAR es aul dee no aun, dee een jebroaknet Hoat haben, un halpt dee, dee een bedrekjten Jeist haben.

²⁰De jerajchta mott väl lieden, oba de HAR halpt am ut aulem rut.

²¹Hee bewoat am un sitt doano daut am kjeene Knoakes bräakjen.

²²Dän gottloosen woat daut Ojjlekj ombrinjen; wäa de jerajchte vestat woat jestroft woaren.

²³De HAR rat sienen Kjnajcht siene Seel; un aul dee, dee äa vetruen opp am saten, woaren kjeene Schult haben.