Read Plautdietsch (Low German) – De Bibel Psalmen 39 Bible Online

Psalmen 39 - Plautdietsch (Low German) – De Bibel bible

Psalmen 39

¹David sien Psalm fa Jedutun väatosinjen.

²Ekj säd: Ekj hab mie väajenomen doano to seenen, daut ekj met miene Tung nich sindjen woa. Ekj woa mie een Toom opplajen, soolang aus de gottloose rom mie sent.

³Oba aus ekj stomm un stell wia un Fräd hilt, un nich emol waut goodet säd, wort miene Kwol bloos jrata.

⁴Mien Hoat en mie wort heet; wan ekj doaräwa nodocht, brend daut aus Fia. Dan funk ekj aun to räden.

⁵Oo HAR, lia mie daut doch, daut et met mie een Enj nämen mott, un woo lang ekj noch to läwen hab, un daut ekj doavon mott.

⁶Kjikj emol, miene Doag sent ver die mau soo aus eene Hauntbreet. Mien Läwen es aus nuscht ver die. Woo goa nuscht es daut doch met aule Menschen, dee no äare Meenunk secha läwen.

⁷De Menschen gonen aula rom aus eene Figua; see moaken sikj väl Orru wua nuscht rut kjemt, see saumlen Rikjtum, oba weeten nich, wäa daut kjrieen woat.

⁸Oba nu, Har, no waut saul ekj luaren? Ekj velot mie opp die.

⁹Moak mie frie von aul miene Sinden, un lot mie nich fa de Noaren een Spott woaren.

¹⁰Ekj woa stell sennen un mien Mul nich opmoaken, wiels daut best du, dee dit äwa mie jebrocht haft.

¹¹Nemm diene Ploag von mie wajch, wiels ekj kom om unja diene Haunt.

¹²Wan du wäm wäajen siene Sinden strofst, dan lat daut siene Scheenheit, aus von de Motten vefräten. Woo es daut met aule Menschen doch soo rajcht nuscht!

¹³Hia mien Jebäd, oo HAR, un horch wan ekj schrie, un sie nich stell wan du miene Tronen sitst; wiels ekj sie dien derchreisenda Gaust, soo aus aul miene Staumvodasch wieren.

¹⁴Kjikj wajch von mie, daut ekj noch emol kunn stoakj un froo woaren, ea ekj von hia wajch mott un nich mea sie.