Read Plautdietsch (Low German) – De Bibel Psalmen 4 Bible Online

Psalmen 4 - Plautdietsch (Low German) – De Bibel bible

Psalmen 4

¹David sien Psalm, met Seidenspell toop, väatosinjen.

²Mien jerajchta Gott, auntwuat mie wan ekj roop. Du jefst mie Troost en miene Angst. Hab Metleet met mie un hia mien Jebäd.

³Woo lang well jie Menschenkjinja miene Iea toschaund moaken? Woo lang well jie junt aun ladje Wieed hoolen un met Läajes omgonen?

⁴Oba dit sell jie weeten, daut de HAR sikj siene heilje aufsondat un wundaboa fieet. De HAR hieet wan ekj am aunroop.

⁵Sindicht nich em Oaja. Rät met jun ieejnet Hoat wan jie em Bad ligjen, un woat stell.

⁶Opfat em rajchten Jeist un sat jun vetruen opp däm HARN.

⁷Väle froagen: Wäa woat ons goodet seenen loten? Lot ons unja diene Uagen em Licht stonen.

⁸Du hast mie mea Freid em Hoaten jejäft aus jane haben, wan dee väl Jeträajd un Wien haben.

⁹Ekj woa mie dol lajen un em Fräd schlopen, wiels daut schaufst bloos du HAR, daut ekj en Sechaheit won.