Read Plautdietsch (Low German) – De Bibel Psalmen 41 Bible Online

Psalmen 41 - Plautdietsch (Low German) – De Bibel bible

Psalmen 41

¹Eent von David siene Psalmen, väatosinjen.

²Jesäajent es, wäa sikj de schwake un oame aunnemt! Däm woat de HAR raden wan hee en Trubbel es.

³Däm woat de HAR bewoaren un aum läwen hoolen, un dee woat oppe Ieed jesäajent sennen, un du woascht am nich en de Fiend äaren Wellen jäwen.

⁴De HAR woat am opp sien Krankenbad stoakjen; du halpst am von siene Krankheit loos.

⁵Ekj säd: HAR, hab Metleet met mie, heel miene Seel, wiels ekj hab jäajen die jesindicht.

⁶Miene Fiend räden schlajchtet äwa mie un sajen: Wanea woat dee stoawen un vejäten woaren?

⁷See komen mie besieekjen oba meenen daut nich von Hoaten; see sieekjen bloos no waut, wua äwa to lastren, un gonen rut un vebreeden äare Läajes.

⁸Dee mie nich lieden kjennen, komen toop un fuschlen jäajen mie un stalen sikj daut oajchste von mie väa.

⁹See sajen: Eene Krankheit, dee toom Doot fieet, haft am jetroffen. Wäa soo dol licht, woat niemols mea oppstonen.

¹⁰Soogoa mien gooda Frint, en dän ekj vetruen haud, dee mien Broot eet, klunjt opp mie met de Feet.

¹¹Oba du, HAR, hab Metleet met mie un recht mie opp, daut ekj dee trigjtolen kaun.

¹²Doaraun woa ekj weeten, daut du een Jefaulen aun mie hast, wiels mien Fient woat mie nich unjakjrieen.

¹³Mie oba halpst du, wiels ekj fromm bliew, un du stalst mie eewich ver die.

¹⁴Loft däm HARN, Israel äaren Gott, von Eewichkjeit bat en aule Eewichkjeit! Amen un Amen.