Read Plautdietsch (Low German) – De Bibel Psalmen 42 Bible Online

Psalmen 42 - Plautdietsch (Low German) – De Bibel bible

Psalmen 42

¹Een Psalm von Korach siene Säns väatosinjen.

²Soo aus een Ree een velangen no freschet Wota haft, soo haft miene Seel een velangen no die, oo Gott.

³Miene Seel darscht no Gott, no dän läwendjen Gott. Wanea woa ekj bat doa komen, daut ekj ver Gott stonen kaun?

⁴Miene Tronen sent Dach un Nacht mien Äten jewast, un de Menschen sajen dän dachäwa: Wua es dien Gott?

⁵Wan ekj mien Hoat en mie selfst utschedd, denkj ekj doaraun woo froo un dankent ekj veropp jinkj, met väle aundre toop, em Gotteshus Heljedoag to fieren.

⁶Wuarom best du soo bedrekjt, oo miene Seel? Wuarom soo orruich en mie? Velot die opp Gott! Wiels ekj woa am noch danken, mien Heilant un mien Gott.

⁷Miene Seel en mie es doljedrekjt. Doawäajen denkj ekj noch aun die von don aus wie aum Jordan wieren, aun dän huagen Hermon, opp dän kjlienen Boajch.

⁸Soo aus daut Jeruzh von de Wotafellen äwa mie kjeemen, soo komen diene toobende Walen nu äwa mie.

⁹De HAR haft vesproaken äwadach met siene truhoatje Leew om mie to sennen. En de Nacht sinj un bäd ekj to am, dee Gott von däm mien Läwen kjemt.

¹⁰Ekj saj to Gott, mienen sechren Steengrunt: Wuarom hast du mie vejäten? Wuarom mott ekj truarich romgonen, wan miene Fiend mie unjadrekjen?

¹¹Waut miene Fiend mie toosaten, es soo aus wan mie de Knoakes em Kjarpa jebroaken woaren; dän dachäwa sajen see: Wua es dien Gott?

¹²Wuarom best du soo bedrekjt, oo miene Seel? Un wuarom soo orruich en mie? Velot die opp Gott! Wiels ekj woa am noch danken, mien Heilant un mien Gott.