Read Plautdietsch (Low German) – De Bibel Psalmen 47 Bible Online

Psalmen 47 - Plautdietsch (Low German) – De Bibel bible

Psalmen 47

¹Een Psalm von Korach siene Säns, väatosinjen.

²Klautscht met de Henj, aule Velkja, jucht ut Freid to onsen Gott!

³Wiels de HAR, dee aules rejieet, es heilich. Hee es een groota Kjennich äwa de gaunze Welt.

⁴De Menschen om ons haft hee ons unjadon jemoakt un de Velkja unja onse Feet jelajcht.

⁵Hee jeef ons Jakob sien wundascheenet Launt aus Oafgoot, daut hee Jakob jejäft haud, wiels hee am goot wia.

⁶Gott de HAR es met jublen un met Trompeetenschaul nopp jefoaren.

⁷Sinjt un loft Gott, sinjt un loft; sinjt un loft onsen Kjennich, sinjt un loft!

⁸Gott es Kjennich äwa de gaunze Welt; sinjt een Psalm, dee am loft.

⁹Gott rejieet äwa de Velkja; Gott sett opp sien heiljen Troon.

¹⁰De Leida von de Velkja sent toopjekomen, aus daut Volkj von Abraham sienen Gott, wiels de groote Mana en de Welt jehieren Gott; hee es huach erhowen.