Read Plautdietsch (Low German) – De Bibel Psalmen 48 Bible Online

Psalmen 48 - Plautdietsch (Low German) – De Bibel bible

Psalmen 48

¹Een Psalmleet von Korach siene Säns.

²De HAR es groot un woat sea jeloft en Gott siene Staut, opp sien heiljen Boajch.

³De heilja Boajch, huach un scheen, to dän de gaunze Welt sikj freit, es de Boajch Zion, dän grooten Kjennich siene Staut.

⁴Gott es en äare Paulausten bekaunt aus eena, bie däm wie secha sent.

⁵Aus de Kjennichs sikj toopschlooten un aulatoop verwoats jinjen,

⁶sagen see de Staut un staunden doaräwa un randen ut Angst doavon.

⁷An äwakjeem eene Angst, daut see zettaden, un soone Weedoag, aus eene Fru bie de Jeburt haft,

⁸soo aus wan du de Schäp von Tarsis derch een Oostwint vebrakjst.

⁹Soo aus wie jehieet haben, soo hab wie daut en dän aulmajchtjen HAR siene Staut uk jeseenen; Gott moakt dee eewich secha.

¹⁰Wie haben medden en dien Tempel doaraun jedocht, oo Gott, woo leeftolich du best.

¹¹Soo aus dien Nomen, oo Gott, soo woascht du selfst äwa de gaunze Welt jeloft; diene rajchte Haunt es voll Jerajchtichkjeit.

¹²Lot dän Boajch Zion froo sennen; lot Juda äare Dajchta sikj doatoo freien, woo du rechten deist.

¹³Moakt junt emol äwahäa un got runtom Zion un talt wooväl Torms doa sent.

¹⁴Paust goot opp no äare Stautswenj, got derch äare Paulausten, daut jie doavon to june Nokomen räden kjennen,

¹⁵un an sajen kjennen, daut dee Gott, dee ons dit aula jejäft haft, es ons Gott, dee ons emma un eewich biestonen woat.