Read Plautdietsch (Low German) – De Bibel Psalmen 51 Bible Online

Psalmen 51 - Plautdietsch (Low German) – De Bibel bible

Psalmen 51

¹Eent von David siene Psalmen, väatosinjen,

²jeschräwen aus de Profeet Natan no am kjeem, aus hee sikj met Batseba aufjejäft haud.

³Gott, lot diene Jnod äwa mie soo groot sennen aus diene truhoatje Leew es; doano aus dien Jaumahoat groot es, reinj mie von miene Sinden.

⁴Wausch mie utem Grunt, daut ekj nich orrajcht go, un reinj mie von miene Sind.

⁵Ekj see miene Veschuldjunk en, un miene Sind steit emma ver mie.

⁶Jäajen die, un eensich die, hab ekj jesindicht, un dit beese jedonen. Du hast daut aula jeseenen, du best doarenn rajcht waut du sajchst, un deist jerajcht rechten.

⁷De Sind wia en mie aus ekj em Muttalief aunsad, un wia en mie aus ekj jebuaren wia.

⁸Secha velangst du ennalich opprechtich to sennen; un dise Weisheit moakst du mie deep em Hoaten kloa.

⁹Reinj mie met Iessopp, dan woa ekj rein sennen; wausch mie, dan woa ekj witta sennen aus Schnee;

¹⁰daut ekj mie kaun freien un froo sennen; daut mien vebroakna Kjarpa sikj wada freien kaun.

¹¹Kjikj wajch, daut du miene Sind nich sitst; wesch aulet beese ut mie rut.

¹²Schauf en mie een reinet Hoat, oo Gott, un jeff mie eenen nieen fauststonenden Jeist.

¹³Steet mie nich ut diene Jäajenwuat, un nemm mie dienen Heiljen Jeist nich wajch.

¹⁴Doo mie de Freid en diene Radunk wada häastalen, un jeff mie eenen Jeist, dee die jehorchen well.

¹⁵Dan woa ekj de Äwaträda diene Wäaj lieren, un Sinda woaren sikj no die dreien.

¹⁶Moak mie von miene Blootschulden frie, oo Gott, du mien Gott un Heilant; dan woa ekj von diene Jerajchtichkjeit sinjen.

¹⁷Oo Har, bewäaj miene Leppen, dan woat mien Mul die to ieren lowen.

¹⁸Du hast kjeen Jefaulen aun Opfa ooda Brauntopfa, sest wudd ekj die dee brinjen.

¹⁹Daut Opfa, daut Gott jefelt, es een jebroakna Jeist; een veenjstet, jebroaknet Hoat woascht du, oo Gott, nich veachten.

²⁰En diene Jnod, doo Zion goodet; bu de Waunt om Jerusalem.

²¹Dan woaren de jerajchte äare Brauntopfa jebrocht woaren, uk gaunze Brauntopfa dee die jefaulen; dan woaren Bolles opp dien Aultoa jeopfat woaren.