Read Plautdietsch (Low German) – De Bibel Psalmen 52 Bible Online

Psalmen 52 - Plautdietsch (Low German) – De Bibel bible

Psalmen 52

¹Unjarecht von David, väatosinjen,

²von don aus Doeg de Edomita kjeem un Saul daut säd daut David bie Ahimelech em Hus wia.

³Wuarom puchst du, du jewaultja, met dien väahaben? Gott blift eewich tru.

⁴Diene Tung plont en de Grunt to brinjen; dee schnitt, soo aus met een schoapet Schäamassa, du schmeichla.

⁵Du hast daut beese leewa aus daut goode, un rätst leewa Läajes aus Woarheit.

⁶Du rätst jieren Wieed, dee toom vedoawen deenen, du hinjat Licht fierende Tung.

⁷Doawäajen woat Gott die opp eewich en de Grunt brinjen. Hee woat die to hoolen kjrieen un ut diene Woninj schlapen, un die ut de Läwendje äa Launt utroden.

⁸De jerajchte woaren daut seenen un sikj ferchten; dee woaren äwa am lachen, un sajen:

⁹Hia es dee Maun nu, dee sikj nich opp Gott siene Krauft veleet, oba sien vetruen en sien grootet Rikjtum sad, un doaderch stoakj wort, daut hee aundre en de Grunt brocht.

¹⁰Ekj oba woa soo bliewen aus een jreena Oliewenboom en Gott sien Hus; ekj velot mie emma un eewich opp Gott siene truhoatje Leew.

¹¹Ekj well die eewich doafäa danken waut du jedonen hast, wiels dien Nomen es goot. Ekj woa die ver aul diene heilje lowen.