Read Plautdietsch (Low German) – De Bibel Psalmen 56 Bible Online

Psalmen 56 - Plautdietsch (Low German) – De Bibel bible

Psalmen 56

¹Een goldnet Jeschenkj von David, aus de Filista am en Gat faustjenomen hauden; väatosinjen, no de Wies: Eene stomme Duw mank de framde.

²Hab Metleet met mie, oo Gott, wiels Menschen bekjamfen un ploagen mie däachlich.

³Miene Fiend sent mie emma hinjaraun. Doa sent väle, dee mie en äa Stolt aunjriepen.

⁴Un wan mie angst woat, velot ekj mie opp die.

⁵Ekj well Gott sien Wuat lowen; en Gott hab ekj mien vetruen, un woa mie nich ferchten. Waut kaun een stoaflicha Mensch mie aundoonen?

⁶Dän dachäwa vedreien see waut ekj saj un plonen woo see mie kjennen beeset toosaten.

⁷See stonen sikj toop, see vestäakjen sikj, see paussen opp wua ekj go, wan see opp de Lua ligjen, mie daut Läwen to nämen.

⁸Sullen dee met äare Sinden wajchkomen? Oo Gott, steet dee Menschen en dienen Oaja en de Grunt.

⁹Hool Räakjnunk von miene Fluchtwäaj; saumel miene Tronen en dien Kruckje. Hast du dee nich opp diene Räakjnunk?

¹⁰Wan ekj die aunroop om Help, motten miene Fiend trigjaun gonen. Daut weet ekj, daut Gott opp miene Sied es.

¹¹Ekj well Gott sien Wuat lowen; ekj well dän HARN sien Wuat lowen.

¹²Ekj hab mien vetruen en Gott; ekj woa mie nich ferchten; waut kjennen Menschen mie aundoonen?

¹³Gott, ekj hab die een Dankopfa vesproaken, un ekj woa die daut brinjen.

¹⁴Du hast miene Seel vom Doot jerat, un mie opp de Feet jehoolen, daut ekj nich foll, un daut ekj ver Gott met de Läwendje em Licht waundlen kaun.