Read Plautdietsch (Low German) – De Bibel Psalmen 57 Bible Online

Psalmen 57 - Plautdietsch (Low German) – De Bibel bible

Psalmen 57

¹Een goldnet Jeschenkj von David väatosinjen, von don aus hee nich omkjeem, aus hee sikj ver Saul en de Heel vestuak.

²Hab Metleet met mie, oo Gott, hab Metleet met mie! Miene Seel velat sikj opp die, un ekj sieekj mie Schutz em Schauten unja diene Flichten, bat daut Ojjlekj vebie es.

³Ekj woa Gott, dän Aulahechsten, aunroopen, dän Gott, dee met mienen Jaumastaunt een Enj moakt.

⁴Dee woat vom Himmel auntwuaten un mie raden. Hee woat dee toschaund moaken, dee opp mie romklunjen. Gott woat mie wiesen, woo tru un truhoatich leeftolich hee es.

⁵Ekj sie medden manke Leiws. Ekj ligj mank rietende Tieren, Menschen, dän äare Tänen Spiessen un Feilen sent, un äare Tungen, soo schoap aus Schwieed.

⁶Gott, lot de Velkja daut seenen daut du äwa aule Himmel steist, un diene Iea äwa de gaunze Welt.

⁷See stalden fa mie eene Faul em Footstich. Miene Seel es unjadrekjt; see groowen een Loch wua ekj go, un sent doa selfst nenn jefollen.

⁸Mien Hoat es reed, oo Gott, mien Hoat es reed von die to sinjen un die to lowen.

⁹Wakj opp, miene Seel, wakj opp miene Hoap un Jittoa! Ekj woa de Morjensonn oppwakjen.

¹⁰Ekj woa die, oo Har, manke Velkja danken; ekj woa manke Menschen von die sinjen.

¹¹Wiels diene truhoatje Leew es groot; dee rieekjt bat aule Himmel, un die es to vetruen, soo wiet aus de Wolkjen gonen.

¹²Gott, lot aul de Velkja daut seenen daut du äwa aule Himmel steist, un diene Iea äwa de gaunze Welt.