Read Plautdietsch (Low German) – De Bibel Psalmen 59 Bible Online

Psalmen 59 - Plautdietsch (Low German) – De Bibel bible

Psalmen 59

¹Een goldnet Jeschenkj von David, daut hee nich omkjeem aus Saul wäm schekjt sien Hus to bewoaken, daut hee am doot moaken kunn.

²Rad mie von miene Fiend, oo mien Gott, beschitz mie von dee, dee jäajen mie komen.

³Rad mie von de beese, un bewoa mie fa Menschen, dee mie jieren doot moaken wellen.

⁴See emol, woo dee fa mie opp de Lua ligjen; de stoakje stonen sikj toop jäajen mie, wua ekj nich schuldich sie, uk nich jesindicht hab, oo HAR.

⁵Ekj hab nuscht orrajchtet jedonen, un doch sent see reed mie auntojriepen. Moak die opp un komm halp mie! Kjikj emol no miene Loag.

⁶Oo HAR Gott, du Aulmajchtja, Israel äa Gott, sto opp aule Velkja to strofen; bewies de beese Veroda kjeen Jaumahoat.

⁷Dee komen zeowes trigj, ranen derch de Staut un julen aus de Hunj.

⁸Kjikj waut dee utem Mul spieen; dee spieen Schwieed ut un sajen dan: Wäa woat daut hieren?

⁹Oba du, oo HAR, lachst äwa an, un spotst äwa aule Velkja.

¹⁰Ekj woa mie aun die hoolen, wiels du, oo Gott, best miene Krauft, dee mie secha helt, mien leewa Gott.

¹¹Mien truhoatich leeftolja Gott woat mie entjäajen komen, un mie miene Fiend äa Ojjlekj seenen loten.

¹²Oba moak dee nich doot, oo Har, ons Schilt, wiels dan wudd ons Volkj daut vejäten, oba bruck diene Macht, dee to vestreien un opp de Kjneeen to brinjen.

¹³Lot an en äa Stolt jejräpen woaren wiels äare sintelje Rädensoat, äa flieekjen un lieejen.

¹⁴Brinj an en dien Oaja äwatsied; brinj dee en de Grunt bat dee nich mea doa sent. Dan woaren de Menschen weeten daut Gott äwa Jakob un äwa de gaunze Welt rejieet.

¹⁵Miene Fiend komen zeowes trigj, ranen derch de Staut un julen aus de Hunj.

¹⁶Dee ranen han un häa no waut to äten un grumsaujen, wan see nich saut woaren.

¹⁷Oba ekj woa von diene Krauft sinjen; ekj woa aule Morjen von diene truhoatje Leew sinjen; wiels du best mien Schutz un miene Tooflucht, wan ekj en Trubbel kom.

¹⁸Ekj well die, miene Krauft, derch sinjen lowen; wiels du, Gott, best mien Schutz un mien truhoatich leeftolja Gott.