Read Plautdietsch (Low German) – De Bibel Psalmen 60 Bible Online

Psalmen 60 - Plautdietsch (Low German) – De Bibel bible

Psalmen 60

¹Een goldnet Jeschenkj von David, väatosinjen no de Roosen Wies;

²aus hee jäajen de Aramäa bie Mesopotamien un de Aramäa von Zoba jekjriecht haud, aus Joab trigj jinkj un 12.000 Edomita en de Soltjäajent doot schluach.

³Gott, dee du ons vestat hast un onse Fiend hast äwa ons komen loten, un wieescht veoajat äwa ons, recht ons wada opp!

⁴Du hast daut Launt vescheddat un opjeräten; heel de Räten, wiels daut Launt bewäacht sikj noch.

⁵Du hast dien Volkj derch schwoare Tieden jefieet; du hast ons Wien jedrenkjt wuavon wie schwäakjten.

⁶Oba fa dee, dee die ferchten hast du eene Flag oppjetrocken, hinja dee see secha stonen.

⁷Rad ons met diene rajchte Haunt un auntwuat opp ons Jebäd, daut dien Volkj, daut du goot best, kaun jeholpen woaren.

⁸Gott räd en sien Heilichtum un säd: Ekj sie froo daut ekj Sichem endeelen kaun un uk daut Sukkot Tol utmäten.

⁹Gilead es mient, un Manasse es mient. Efraim es miene Koppbedakjunk, un Juda halpt mie daut Jesaz uttofieren.

¹⁰Moab es miene Wauschbett, un äwa Edom schmiet ekj miene Schoo, un äwa de Filista schrie ekj em Triumf.

¹¹Wäa woat mie en de stoakje Staut nenn brinjen? Wäa woat mie en Edom nenn leiden?

¹²Woascht du daut nich doonen, oo Gott, du dee ons vestatst un nich mea met onse Kjrieja met jeist?

¹³Sto ons bie en onse Noot, wiels Menschenhelp halpt nuscht.

¹⁴Wan Gott met ons es, woa wie fauststonen. Hee woat onse Fiend unjaklunjen.