Read Plautdietsch (Low German) – De Bibel Psalmen 64 Bible Online

Psalmen 64 - Plautdietsch (Low German) – De Bibel bible

Psalmen 64

¹Eent von David siene Psalmen, väatosinjen.

²Gott, horch woo ekj mie em Jebäd bekloagen doo; bewoa mien Läwen fa miene jreselje Fiend.

³Bewoa mie fa de beese äare Aunschläaj, un waut de schlajchte jäajen mie jeplont haben.

⁴Dee schoapen sikj äare Tungen aus Schwieed, un zielen met äare jeftje Wieed aus met Feilen.

⁵Dee scheeten utem Vestäakj no een oschuldjen Maun; see scheeten plazlich no am onen sikj to ferchten.

⁶Dee spräakjen sikj unjarenaunda Moot too en äare beese Plons. See räden von heemlich Schlenjen lajen, un sajen: Wäa woat daut seenen?

⁷See plonen Ojjerajchtichkjeit. Wie haben ons een volkomnen Plon utjedocht, sajen see. Wiels een Mensch sien Hoat un siene Jedanken sent een Jeheemnis.

⁸Oba Gott woat dee met Feilen scheeten; dee woaren plazlich hanjestrakjt woaren.

⁹Hee woat äare ieejne Wieed jäajen an dreien, un an en de Grunt brinjen. Un wäa an sitt, woat äwa an spotten un met däm Kopp schedren.

¹⁰Aule Menschen woaren sikj ferchten un sajen: Daut haft Gott jedonen! un woaren doaräwa nodenkjen, waut hee jedonen haft.

¹¹De jerajchte woaren sikj em HARN freien, un sikj opp am veloten. Wäa em Hoaten opprechtich es, saul am lowen.